Dili, 12 Agostu 2026 (Media Democracia) – Embaixada Tailándia iha Timor-Leste kontinua hametin kooperasaun ho Fundasaun Alola hodi apoia esforsu empoderamentu feto iha Timor-Leste, liuliu grupu feto inan ne’ebé envolve iha atividade soru tais, hanesan parte husi esforsu atu hasa’e kapasidade ekonomia no independénsia feto sira.
Tuir Diretora Ezekutiva Fundasaun Alola, Maria Imaculada Guterres, afirma objetivu husi sorumutu ne’e mak ko’alia kona-ba apoiu fundus ba feto artezanatu sira, liuliu grupu inan soru tais no soru-nain sira ne’ebé durante ne’e hetan apoiu husi Fundasaun Alola.
Diretora ne’e hateten katak Fundasaun Alola, durante ne’e, kontinua apoia grupu feto soru tais iha munisípiu sira, ho fó prioridade ba kapasitasaun, hadi’a kualidade produtu no ajuda sira atu asesu ba merkadu.
“Ohin fundasaun Alola hetan konvite husi Embaixada Tailándia atu mai partisipa iha eventu ida ne’e kona-ba entrega fundus ki’ik mai iha Fundasaun Alola, ho objetivu atu apoiu ba feto artejenatu liu-liu ba inan soru tais sira no soru na’in sira ne’ebé mak durante ne’e Fundasaun Alola apoiu iha munisipiu sira, ho orsamentu oituan bele ajuda iha grupo rede soru tais ho kapasitasaun kualidade produto nian oinsa sira bele verifikasaun ba iha prodotu liu-liu iha soru tais ne’ebé mak sira produz, oinsa bele halo prodotu oioin atu nune’e bele fa’an iha merkadu. Alende ne’e mos bele suporta Fundasaun Alola nune’e bele fó espasu ba inan soru tais sira iha artejenatu, atu mai hola parte no marka prezensa ka hola fatin iha espaso feria ninian”. Dehan Diretora Ezekutiva Fundasaun Alola Maria Imaculda Guterres, iha Embaixada Tailándia Farol Terça Feria 11/08/2026.
Diretora Ezekutiva ne’e informa Alola sempre fó espasu kada tinan ida dala rua (2) hodi hetan redementu ba feria nune’e bele hakbi’it grupu feto soru tais sira liu husi ekonomia familia uma laran no ajuda edukasaun ba oan sira liu husi nutrisaun ba labarik sira.
“Fundasaun Alola sempre halo feria kada tinan dala rua (2) iha tempu natal ka crismavez no mos iha tempu paskua ninian no ita bolu mediafel no cristiafel ida ne’e atu tulun inan feto sira ka feto maluk sira liu-liu sira ne’ebé soru tais no atu bele hetan rendimentu hodi tulun sira ninia ekonomia uma laran no mos tulun edukasaun ba oan liu husi nutrisaun ba labarik sira. Fiar katak ida ne’e laos deit primeira vez maibé ida ne’e kada tinan husi embaixada Tailándia sempre fó apoiu fundus ki’ik mai ami atu bele suporta grupo feto sira ne’ebe ami hari’i, liuliu hare’e ba iha kbi’it ekonomia feto ninian”.nia esplika
Nia esklarese tan osamentu ne’ebé apoiu husi Embaixada Tailandia ho montante Três mil resin ne’ebé serbisu hamutuk ho fundasaun Alola hodi apoiu ba iha grupo hamutuk 43 no sei estabelese kada Munisipiu sira hotu liliu kualidade produtu kona-ba diversifikasaun produtu soru tais nian.
“Iha orsamentu tres-mil resin ne’ebé mak sira intrega ba ami atu ba apoiu iha grupu ha’at nolu resin tolu (43) ne’ebe mak ami estabelese ona ba grupo redi soru tais ne’ebé durante ne’e akompanha husi Fundasaun Alola, no reprezentante munisipiu sira hotu liuliu ba grupu sira ne’e mai husi ne’eba tanba desde tina 2003 Alola hari’i grupo soru tais, sira reprezenta munisipiu sira ne’e iha hotu”. Nian tenik
Aleinde ne’e, reprezenta Embaixadór Tailándia iha Timor-Leste, Atipat Rojanapaibulya, hatete katak konsisténsia no kompromisu husi Embaixada Tailándia iha Timor-Leste eziste ona desde tinan 2012 to’o agora, liuhusi apoiu no ajuda, liuliu iha área empoderamentu ba grupu feto vulnerável sira iha Timor-Leste, ne’ebé inklui membru sira iha ASEAN, atu nune’e sira bele hetan apoiu no la husik sira mesak iha kotuk.
“Konsisténsia husi Embaixada Tailándia iha Timor-Leste hahu ona desde tinan 2012 to’o agora. Asisténsia ne’e fó atu ajuda, liuliu iha empoderamentu ekonómiku ba feto no labarik sira. Asisténsia ne’e mos destina ba grupu vulnerável sira, inklui inan-feto no labarik sira, acet 75% liuliu iha nível nasionál, no mós ba juventude sira ne’ebé iha poténsia atu dezenvolve no hasa’e kapasidade juventude iha Timor-Leste. Relasaun entre Tailándia ho Timor-Leste ne’e la’ós de’it relasaun entre governu rua, maibé mos relasaun entre nasaun rua, liuliu entre povu rua. Espesialmente agora Timor-Leste sai ona membru ASEAN, ita labele husik membru ida iha kotuk. Ita tenke ajuda no la’o hamutuk ba oin. Relasaun ne’e la’ós de’it entre governu sira, maibé entre nasaun rua no liuliu entre povu rua, atu hametin no hasa’e kapasidade Timor-Leste hanesan membru ASEAN.” Dehan, reprezenta Embaixadór Tailándia iha Timor-Leste.
Entretantu, iha biban ne’e, Embaixadór afirma kompromisu Governu Tailándia nian atu hametin seguransa umana no promove empoderamentu feto no labarik sira iha Timor-Leste, liuhusi kooperasaun iha área saúde públika, edukasaun no dezenvolvimentu ekonómiku.
Husi tinan 2012 to’o agora, Governu Tailándia, liuhusi Embaixada Reál Tailándia iha Dili, kontinua fó apoiu finanseiru no ekipamentu ba Fundasaun Alola, ho objetivu atu suporta programa no atividade sira ne’ebé fó benefísiu ba feto, labarik no komunidade vulnerável sira iha Timor-Leste.
Reportagem : Lourenço / Santina / Estagiadus
Foto : Lourenço