Díli, 5 Maiu 2026 Media Democracia– Família Saudozu Liurai Verissimo, preokupasaun boot kona-ba desizaun husi Ministériu Asuntus Combatentes Libertasaun Nasionál (MACLN) ne’ebé anula títulu Martír Libertasaun Nasional ba Verissimo, ne’ebé durante tinan rua-nulu-resin konsidera hanesan parte importante husi istória luta independénsia Timor-Leste.
Tuir Porta-voz José Filipe Quintas hateten, Desizaun ne’e la tuir prinsipiu transparánsia no prosedimentu ne’ebé klaru, prosesu anulasaun la involve kordenasaun ho CCLN Munisipiu Lautem, ne’ebé durante ne’e responsavel ba rekolla no verifika dadus kona-ba veteranu sira iha nivel lokal.
“Iha munisípiu, ami bazeia ba dadus ne’ebé iha, maibé laiha investigasaun klean ida ne’ebé halo molok sai desizaun final. Família mós lamenta katak desizaun ne’e bazeia de’it ba informasaun husi parte balun, la inklui testemunya ka klarifikasaun husi família Verissimo rasik. Sira konsidera katak ida ne’e bele afeta kredibilidade prosesu no la respeita prinsipiu audiénsia bilateral ne’ebé tenki fó oportunidade ba parte hotu-hotu atu hatete sira nia laran”. Dehan Porta-voz José Filipe Quintas, iha Salaun Esperansa
Kontroversia aumenta tanba informasaun kona-ba anulasaun Títulu Martír ne’e uluk sai públiku iha média sosiál, liu-liu Facebook, antes família simu notifikasaun ofisiál.
Família afirma katak to’o loron 27 Abril 2026 mak sira simu informasaun formal, maski desizaun refere halo ona iha loron 24 Abril 2026 no uluk liu viral ona iha media sosial Facebook. Situasaun ida ne’e, tuir família, la respeita prosedimentu administrativu ne’ebé normalmente liu husi Luciano Valentino “Timor-Maubere”.
Aleinde ne’e, família levanta mós kona-ba prosesu anulasaun. prosesu atu hetan títulu martír normalmenti presiza tempu naruk, husi fulan ne’en to’o tinan ida, liu husi etapa rekollamentu dadus, investigasaun no aprovasaun. Maibé iha kazu Verissimo, anulasaun akontese iha tempu badak liu, ne’ebé halo dúvida kona-ba rigor investigasaun ne’ebé halo.
Iha fatin hanesan Oan mane César Dias Quintas, dehan katak sira respeita instituisaun sira, maibé espera katak desizaun tenki bazeia ba faktu no la iha influénsia husi interese grupu balun.
‘’Iha tinan kotuk tentativa atu kontesta estatutu Verissimo iha Munisípiu Lautém, maibé CCLN Lautem iha tempu ne’ebá rejeita tanba la iha provas sufisiente. Ita fiar katak loos sei nafatin loos no sala sei nafatin sala, maibé ita tenki respeita malu no labele uza situasaun hanesan ne’e atu defama ema ka desvaloriza sira nia kontribuisaun,” Dehan César.
Nia Esplika tan Família Verissimo husu ba públiku, sosiedade sira no parte relevante sira atu akompaña kazu ne’e ho atensaun, atu garante katak prosesu ne’ebé iha relasaun ho istória luta libertasaun nasional halo ho transparánsia, justisa no respeitu ba ema hotu ne’ebé kontribui ona.
To’o agora, Ministériu Asuntus Combatentes Libertasaun Nasionál seida’uk fó esplikasaun públika detallu kona-ba razaun prinsipál ba anulasaun títulu martír refere. Família espera katak iha tempu badak sei iha klarifikasaun ofisiál no, se presiza, investigasaun independente ida atu hatuur verdade kona-ba kazu ne’e.
Reportajen : Tomás dos Santos
Foto : Tomás dos Santos