Dili 06 Jullu 2026 (Media Democracia) – Governo liu husi Ministériu Juventude, Desportu, Arte no Kultura (MJDAK) ho Plan Internasional Timor-Leste ofisialmente asina Nota Intendimentu ida atu haforsa parseria no servisu hamutuk iha área dezenvolvimentu juventude, desportu, arte, kultura no empreendedorizmu.
Tuir Diretór Jeral Servisu Korporativu MJDAK, João dos Santos, hateten katak formalizasaun parseria ne’e importante atu haforsa atividade sira ne’ebé durante ne’e implementa ona entre Plan Internasional no Diresaun Jeral Juventude.
“Formalizasaun Nota Intendimentu ida-ne’e atu habelar no hametin entendimentu entre MJDAK no Plan Internasional kona-ba atividade sira ne’ebé durante ne’e hala’o hamutuk ona ho Diresaun Jeral Juventude. Ho asinatura ida-ne’e, ita bele kontinua serbisu ho koordinasaun di’ak liután no asegura katak programa sira ne’ebé implementa fó benefísiu direta ba juventude Timor-Leste,” dehan João dos Santos ba jornalista sira iha Serimónia asinatura ne’e realiza iha Salaun Ema ho Defisiénsia (EhD) MJDAK, Lecidere, Dili, sexta-feira iha loron (03/07/2026).
Nia hatutan katak durante ne’e MJDAK no Plan Internasional servisu hamutuk iha munisípiu ha’at ne’ebé sai área prioridade ba organizasaun ne’e. Programa sira ne’e fó atensaun ba dezenvolvimentu kapasidade juventude liu husi desportu, kriatividade, arte no kultura, no mos empreendedorizmu atu prepara foinsa’e sira sai independente no kontribui ba dezenvolvimentu nasaun. Nia dehan parseria ne’e sei loke oportunidade barak liután ba juventude atu partisipa iha atividade konstrutivu no aumenta sira-nia kapasidade lideransa no inovasaun.
Iha sorin seluk, Country Director Plan Internasional Timor-Leste, Fátima Estrela Soares, konsidera asinatura Nota Intendimentu ne’e hanesan pasu estratéjiku ida atu formaliza relasaun servisu ne’ebé durante ne’e la’o di’ak ona entre instituisaun rua.
“Ohin loron importante tebes ba Plan Internasional Timor-Leste. Ami kontente tanba finalmente bele formaliza parseria ida-ne’e ho MJDAK. Formalizasaun ne’e sei haforsa ami-nia kompromisu atu kontinua serbisu hamutuk ho juventude Timor-Leste no garante katak programa sira ne’ebé ami implementa responde ba nesesidade sira iha komunidade,” hateten Fátima Estrela Soares.
Nia esplika tan katak Plan Internasional atualmente servisu hamutuk ho grupu juventude liu 20 iha programa oioin, inklui agrikultura no ortikultura, promosaun be’e mos no resiklazen, adaptasaun ba mudansa klimátika, saúde reprodutiva, no fortalese lideransa juventude.
“Ami fiar katak investimentu ba juventude mak investimentu ba futuru Timor-Leste. Tanba ne’e, ami sei kontinua servisu hamutuk ho governu no parseiru sira atu juventude sira bele hetan oportunidade atu dezenvolve sira-nia potensial no sai lider sira ba futuru,” dehan nia.
Ho formalizasaun Nota Intendimentu ida-ne’e, MJDAK ho Plan Internasional Timor-Leste espera parseria ne’e bele aumenta efisiénsia implementasaun programa sira, habelar asesu ba oportunidade ba juventude iha munisípiu sira, no kontribui ba dezenvolvimentu sustentável no inkluzivu iha Timor-Leste.
Reportajen : Tomás dos Santos
Foto : Tomás dos Santos