Dili -18 de Abril 2026 (Media Democracia)- Institutu Nasional Kombate HIV-SIDA (INCSIDA) halo sensibilizasaun transmisaun moras HIV-SIDA ba Juventude sira husi Partidu Demokratiku (PD), oinsa atu prevene aan husi moras refere.
Tuir Presidente Institutu Nasional Kombate HIV-SIDA, Daniel Marcal Hateten, nu’udar Partidu Politiku tenki proteje aan husi HIV/SIDA, tanba joven sira mak sei sai lideransa ba rai ida ne’e.
“Hanesan Partidu Polítiku ne’e tenke prepara ita nia an hodi proteje sira aan, tanba sira hanesan lideransa, no ema polítiku sira, sei ba tuir iha partisipasaun iha posisaun polítiku, sira estatus diak, entaun sira tenke iha saúde ne’ebé di’ak. Bainhira sira nia saúde la diak, oinsa sira atu aprende no abandonu partidu polítiku sira no sira sei lakon lideransa ne’ebé mak dia’k. tanba HIV ne’e la hili ema ne’ebé lider ka la lider”.Dehan Presidente INCSIDA Daniel Marcal iha Edifisiu INCSIDA (16/04/2026).
Iha parte seluk tuir Presidente Interno Partidu Demokratiku (PD), Samuel Mendonça Hatutan HIV/SIDA ne’e hanesan pandemia ida ne’ebé mak nasaun hotu-hotu hakribi ho nune’e ita tenki sensibilza ita nia aan atu bele Kombate HIV-SIDA.
“Virus HIV-SIDA ne’e hanesan pandemia ida ne’ebé mak nasaun hotu-hotu hakribi,liu-liu ba ita nia foin sa’e sira iha Partidu Politiku sira, atu belekuidadu aan nune’e bele prevene aan virus HIV-SIDA , virus ida ne’e hanesan funu bo’ot ida ne’e mak ita tenki antisipa no halo prevensaun ba moras refere, no husu ba joven sira prevene aan atu labele hola parte iha seksu livvre’’. Dehan Presidente Interno Partidu Demokratiku (PD), Samuel Mendonca
Alende ne’e Representante Juventude Partidu Demokratiku (PD), Paulo de Jesus, Hateten nia orgulhu tanba bele hetan informasaun ne’ebé di’ak kona-ba oinsa Kombate virus HIV-SIDA ne’ebé mak espalha tebes iha Timor Leste.
“Hanesan juventude Partido Democrático (PD), orgulhu tebes ba loron ohin bele hetan informasaun ne’ebé d’iak duni atu hodi bele Kombate HIV/SIDA ne’ebé mak espalha makas iha ita nia rai. Tanba juventude mak hanesan agente transformasaun iha sosiedade, tanba ne’e presiza duni hatene informasaun ne’ebé kle’an. Informasaun ne’ebé di’ak bele transmite informasaun ba ita nia sosiedade, bele hetan informasaun ne’ebé positivu iha ita nia komunidade, no oinsa bele halo prevensaun ba ita nia aan husi moras HIV-SIDA, tanba moras ida ne’ebe perigozu tebes ba ita”. Dehan Juventude Partidu Demokratiku Paulo de Jesus.
Sensibilizasaun ba kombate HIV-SIDA ba Juventude Partidu Demokratiku (PD), mak atividade importante atu hasa’e koñesimentu no konsiénsia juventude sira kona-ba prevensaun, tratamentu no eliminasaun ba ema ho HIV SIDA, oinsá atu prevene, no importánsia teste ra’an no tratamentu sedu ho sensibilizasaun ida ne’e, espera katak juventude Partidu Demokratiku bele kontribui ativamente iha luta hasoru HIV SIDA.
Reportajen : Tomás dos Santos/ Novita Estajiadu
Foto: Novita Estajiadu