Dili, 09 Janeiru 2026 (Média Democracia) – Komunikadu imprensa Prezidente no Laureadu Prémiu Nobel Dame nian, José Ramos-Horta, simu karta kredensial diplomátika husi Sua Exelénsia Yamamoto Yasushi, nu’udar Embaixadór Estraordináriu no Plenipotensiáriu foun Japaun nian ba Repúblika Demokrátika Timor-Leste. Serimonia entrega kredensial ne’e hala’o iha Palasiu Prezidensial Nicolau Lobato.
Prezidente hateten iha komunikadu, Embaixadór Yamamoto maka diplomata senior ida ho kareira distinta ida ne’ebé dura ona liu dékada tolu iha Ministériu Negósiu Estranjeiru Japaun nian. Lisensiadu husi Universidade Tókio no Universidade Harvard, nia kaer ona kargu importante sira iha Ázia no Europa, inklui kargu sira ho nivel aas oioin iha Embaixada sira iha Xina no Koreia-Súl nomos desempeña funsaun nu’udar Ministru iha Embaixada Japaun nian iha Filipina. Ninia esperiénsia kle’an iha diplomasia rejionál inklui kargu Diretór sira iha Sekretariadu Gabinete nian ba kestaun sekuestru no iha Departamentu Asuntu Aziátiku no Oseánia sira nomos períodu ida iha Sekretariadu ba Kooperasaun Trilaterál iha Seul. Ninia kargu ikus liu mak nu’udar Embaixadór ba Uniaun Europeia, hodi hatudu ninia expertise kle’an iha asuntu bilaterál no multilaterál, antes ninia nomeasaun nu’udar Embaixadór Estraordináriu no Plenipotensiáriu Japaun nian iha Repúblika Demokrátika Timor-Leste.
“Ha’u fó benvindu ba Embaixadór YAMAMOTO Yasushi mai Timor-Leste. Japaun nia amizade no apoiu ne’ebé la nakdoko dezde ami-nia independénsia sai fundamentál ba ami-nia nasaun nia trajetória. Ha’u iha konfiansa katak, iha Embaixadór Yamamoto nia lideransa, ita sei haree ita-nia kooperasaun sai kle’an liután, partikularmente iha área infraestrutura, enerjia renovável no investimentu privadu, hodi aproveita impulsu enkontru nivel aas foin lalais ne’e no kompromisu partilladu ba rejiaun ida ne’ebé pasífika no próspera.” Dehan Prezidente Republika Timor-Leste José Ramos Horta
Prezidente hatutan iha komunikadu, dezde estabelese relasaun diplomátika iha tinan 2002, Timor-Leste no Japaun harii ona parseria ida ne’ebé sólida bazeia ba respeitu malu no fahe valór sira nu’udar nasaun marítima sira ho istória reziliénsia nian. Japaun sai hanesan apoiante importante ida ba Timor-Leste nia dezenvolvimentu, fornese asisténsia iha materia infraestrutura, saúde, edukasaun no redusaun risku dezastre nian (no protesaun ambientál, entre sira seluk), liuhusi Ajénsia Kooperasaun Internasionál Japaun (JICA), organizasaun internasionál sira no ONG Japoneza no Timor-oan sira.
“Liuhusi vizita sira ho nivel aas husi Primeiru-Ministru iha dezembru 2023 no Prezidente da Republika iha Fulan Agostu 2025, relasaun bilaterál sira hetan elevasaun ba “Parseria Abranjente”. Kooperasaun dezenvolvimentu nian avansa maka’as, ne’ebé marka ho konstrusaun enfermaria ospitalár foun no sentru partu 20, hamutuk ho konstrusaun futuru terminál aeroportu ida no konkluzaun projetu infraestrutura rurál hamutuk 155 iha tinan tolu ikus ne’e.” Hatutan Prezidente iha Komunikadu Imprensa
Prezidente afirma, inisiativa importante sira mós habelar ona, hanesan programa kuda ai-funan fresku no investimentu boot Japaun nian iha konstrusaun ró no enerjia solar. Aleinde ne’e, interkámbiu interpesoál liuhusi programa estájiu, interkámbiu akadémiku no vizita foin-sa’e sira kontinua hametin liután ligasaun entre nasaun rua ne’e.
Esplika liután katak Prezidente José Ramos-Horta manifesta konfiansa tomak katak mandatu Embaixadór Yamamoto Yasushi nian sei hasa’e no sei reforsa lasu amizade no kooperasaun ne’ebé dura entre Timor-Leste no Japaun.
Reportajen : Nelfiano
Foto : Media PR