Dili, 03 Setembru 2026 (Media Democracia)- Ministru Interiór, Francisco da Costa Guterres, simu ona relatóriu husi Komandu Jerál PNTL kona-ba envolvimentu membru PNTL ida husi Unidade Patrollamentu Fronteira (UPF), ne’ebé suspeitadu iha kazu omisídiu ne’ebé akontese iha área Wetaba, Postu Administrativu Tilomar, Munisípiu Covalima, iha fulan Jullu 2026.
“Relatóriu hetan ne’e lalika husu tan ida ne’e, iha relatóriu agora ita entrega ba Investigasaun Kriminál investigasaun hotu tiha tanba prosesu ne’e prosesu prosesu krime entaun entrega hotu sira sei haruka ba iha Ministeriu Públiku prosesa no hetan primeiru interogatoriu ikus lori bá ona para atu prosesa ba iha ne’ebá.” Dehan Ministru Francisco Guterres ba jornalista sira hafoin partisipa reuniaun Konsellu Ministru iha Palásiu Governu kuarta ne’e (02/09).
Francisco hatete, Komandu PNTL sei foti mós medida kona-ba kestaun refere liuliu liga ba kestaun administrativu.
“Kuandu submete ona ba iha prosesu investigasaun iha ninian prosedimentu ne’ebé mak PNTL sei foti hasoru nia membru ne’e duni. Ha’u ladún hatene ekipa sekretu husi ne’ebé? ha’u la hatene, maibé relatóriu ne’ebé ha’u simu dehan membru UPF mós envolve. Mas ha’u la simu ekipa sekretu ruma. Ne’ebé ha’u ladún entende buat ne’e.” Nia afirma.
Nia informa, iha relatóriu ne’e la sita katak suspeitu sira servisu sekretu, maibé iha relatóriu ne’e sita katak iha membru UPF ida no iha membru SNI balun.
“Ne’e ha’u ladún hatene, ha’u hatene iha mebru UPF ida informa mak ne’e ita husik akompaña para depois to’o prosesu ne’e ita entermus de ninian modalidade ha’u hanoin SNI mós iha mekanizmu para bele hasoru ninian membru atu bele mós investiga nia membru ida.” Nia dehan
Governante ne’e dehan, ba membru UPF ne’ebé mak suspeitadu kazu omisidiu ne’e depende ba investigasaun mak Komandu PNTL sei foti desizaun.
“Ha’u hanoin sansaun ne’e depende ba gravidade krime ne’ebé sira halo tanba ida ita tenke haree husi Tribunál. Tanba Tribunál deside ida, depois mak husi parte PNTL mós sei foti tuir gravidade krime ne’ebé sira halo ne’e.” Tenik Nia
Membru UPF ne’ebé suspeitadu envolve kazu Wetaba tuir prosedimentu Polísia nian kataka kuandu polísia ida suspeitadu envolve iha kazu ruma automatikamente tuir prosedimentu operasionál polísia nian ne’e mebru ida kuandu submete ba iha investigasaun nia kilat foti kedan ona.
“Ne’e hakarak ka lakohi ne’e lalika tan iha dezarma ka la dezarma automatikamente prosedimentu hatudu katak nia deskonfia nia viola regra ruma, kuandu ba foti nia ne’e kilat foti kedan.” Guterres esplika
Ministru Francisco dehan, membru UPF ne’ebé suspeitadu ba kazu iha Wetaba ne’e polísia ba kaer tanba nia mós suspeita ba kazu referida tanba polísia detein ne’e.
“Tanba ne’e mak PNTL foti desizaun kaptura nia ne’e. Se fose PNTL mak lakaptura ne’e pior liu tan. Ita tenke louva ba polísia nasionál Timor-Leste tanba sira konsege kaer nia membru ne’ebé mak sira deteta katak deskonfia envolve iha krime. Ida ne’e tenke louva sira. Prosesu sira ne’e mak ita buka tau polísia iha disiplina para servisu ho loloos, la loos o tenke submete ba prosesu investigasaun.” Nia dehan
Nia dehan, ba kazu ne’e nia lakohi ko’alia klean liu tanba hein investigasaun.
“Agora ha’u labele ko’alia ein nome polísia nega. Husik ba prosesu investigasaun la’o depois mak sira sei relata. Ha’u sei laiha komentáriu ba iha ne’ebá iha prosedimentu atu buka tuir sira ne’ebé ida ne’e di’ak hela, entermus horsida mekanizmu internal ne’e iha ona SNI sei haree.” Nia adianta
Nia hatete, entrega prosesu sira ne’e ba iha Ministeriu Públiku no Tribunál mak horsida prosesa kazu ne’e.
“ Ema sira ne’ebé mak suspeitadu ba kazu ne’e tanba kazu ne’eita bolu krime ida oho ema, ba ida ne’e buat ida ke loos ne’e labele akontese. Loloos ne’e instituisaun mebru ne’ebé mak servisu ba instituisaun seguransa estadu nian ne’e tenke proteje ema protese sidadaun sira, proteje ema ne’ebé vuneravel ida ne’e mak importante.” Dehan Nia
Antes ne’e, iha segunda (31/8) foin lalais Diresaun Servisu Investigasaun Kriminál ezekuta mandadu Tribunál Judisiál Primeira Instánsia Suai hodi detein suspeitu na’in haat ba kazu omesidiu ne’ebé akontese iha Wetaba, Postu Administrativu Tilomar Munisípiu Covalima hasoru sidadaun feto ida iha fulan Jullu foin lalais.
Reprtajen : Estefania Cardoso
Foto : Estefania Cardoso