Dili- 23 Jullu 2026 (Media Democracia)– Ministru Joventude, Desportu, Arte no Kultura (MJDAK) simu apoiu ekipamentu desportu husi Governu Repúblika Popular Xina, ho objetivu atu hametin dezenvolvimentu setór desportu no fó oportunidade ba juventude Timor-Leste atu partisipa iha atividade desportiva ho fasilidade ne’ebé di’ak liután. Apoiu ne’e mos reforsa relasaun koperasaun entre Timor-Leste no Xina iha área juventude no desportu
Tuir Ministru Joventude, Desportu, Arte no Kultura (MJDAK), Nelyo Isaac Sarmento, apoiu ekipamentu desportu ida ne’e hanesan provizaun importante ida hodi promove no insentiva labarik no juventude sira atu pratika atividade desportiva, liuliu futeból, hodi hasa’e sira-nia talentu no saúde.
“Ohin ekipamentus desportu ne’ebé Governu Xina fó liu husi ninia apoiu sei fó benefísiu boot ba grupu labarik no juventude sira ne’ebé pratika desportu, liuliu futeból. Ekipamentu hirak ne’e sei uza ba atividade treinamentu no dezenvolvimentu atleta sira. Alende ne’e, apoiu ne’e inklui mós ekipamentu ba desportu boxing, hanesan ring boxing (ring tinju), no fasilidade seluk ne’ebé treinadór sira presiza atu hasa’e kualidade treinamentu”.Deklarasaun ne’e hato’o husi Ministru MJDAK, Nelyo Isac Sarmento, ba jornalista sira iha edifísiu MJDAK, Bidau Lecidere, iha quinta-feira, 23 fulan Jullu 2026.
Nia hatutan katak importante liu la’ós hare’e de’it ba kuantidade ekipamentu ne’ebé simu, maibé hare’e ba komitmentu no apoiu husi Governu Xina atu kontribui ba dezenvolvimentu atividade desportiva iha Timor-Leste.
“Apoiu ida ne’e la’ós hare’e de’it ba kuantidade ekipamentu ne’ebé simu, maibé hare’e ba intensaun no komitmentu husi Governu Xina atu apoia Timor-Leste iha dezenvolvimentu atividade desportiva. Apoiu ne’e mós reflete sira-nia hakarak atu ajuda Timor-Leste hodi kria fasilidade desportiva ne’ebé adekuadu, liuliu ba labarik no juventude sira, atu bele pratika desportu no prepara futuru ne’ebé di’ak liu,” hatete nia.
MJDAK mós lori naran Povu no Governu Timor-Leste hodi hato’o agradesimentu ba Governu Xina tanba apoiu ekipamentu desportu ne’ebé fó ba Timor-Leste. Nia espera katak grupu juventude no atleta sira bele utiliza ekipamentu hirak ne’e ho di’ak no responsavel atu kontribui ba dezenvolvimentu desportu iha nasaun.
Entertantu ekipamentu ne’ebé mak hetan apoiu mak hanesan bola futebool ring boxing ka sangsat ekipamentu ki’ik oan ba treinador sira nian no labarik sira nain inklui buat seluk tan.
Respoetagem : Loureço / Joaninho / estagiadus
Foto : Joaninho