Dili, 10 Novembru 2025 (Média Democracia) – Parlamentu Nasionál (PN) aprova ona Projetu Proposta Lei (PPL) no.23/VI (3a) kona-bá Orsamentu Jerál Estadu (OJE) tinan fiskál 2026 iha debate faze jeneralidade loron da-toluk nian parte lorokraik, ho votus a favór 42, abstensaun 23 no kontra 0, iha Parlamentu Nasionál (PN) sesta (07/11/2025). Informasaun ne’e Média Democracia asesu pajina Primeiru-Ministru.
Hafoin votasaun, Prezidente Parlamentu Nasionál, Maria Fernanda Lay deklara ofisialmente katak, Orsamentu Jerál Estadu tinan 2026 pasa ona.
Primeiru-Ministru (PM), Kay Rala Xanana Gusmão agradese bá Deputadu sira iha Parlamentu Nasionál ne’ebé partisipa ativu iha prosesu diskusaun ne’e no Governu konsidera nafatin hanoin di’ak sira hosi bankada opozisaun.
“Ha’u atu dehan de’it Governu konsidera hanoin sira ne’ebé kapas, furak no intelejente mai husi bankada opozisaun. Ami sei buka aprende nafatin ho ita-boot sira nia sabedoria, maibé la iha ona tempu atu halo fali OJE foun ida tuir ita-boot sira nia hanoin, programa, vizaun no estratejika. Ne’ebé ami kala husu de’it katak ita komprende malu ba, husik ami estraga nafatin povu nia moris ba, hodi bele la’o tuir povu mak sei julga.” Dehan Primeru-Ministru, Kay Rala Xanana Gusmão
Proposta Lei OJE 2026 Billiaun $2.214.689,195 ho kategoria saláriu no vensimentu $476.870.249, bens no servisu korrente $447.904.446, transferénsia públika $820.710.160, kapitál menór $32.556.96 no kapitál dezenvolvimentu $436.647.379.
Sesaun Plenária ne’e, prezide husi Prezidente Parlamentu Nasionál, Maria Fernanda Lay, akompaña husi Membru Meza sira, prezente mós membru Governu sira ho entidade relevante sira.
Esplika liután tuir kaléndáriu apresiasaun proposta Lei OJE 2026, debate no votasaun espesialidade no votasaun finál globál sei hala’o iha 13-26 Novembru 2025.
Reportajen : Nelfiano
Foto : Media GPM