Dili, 28 Abril 2026 (Media Democracia)- Ekipa konjuta Kompostu husi Diresaun Servisu Investigasaun Kriminal (DSIK), Servisu Nasionál Itelijénsia (SNI) ho Servisu Informasaun Polisia (SIP), kaptura sidadaun estranjeiru na’in lima (5), ne’ebé hala’o hela atividade tranzasaun ilízitu droga (Sabu-Sabu) iha Munispiu Dili Laran.
Sidadaun estranjeiru hirak ne’e kompostu husi sidadaun Chineza na’in ida (1) no sidadaun Indonézia na’in haat (4), ne’ebé ekipa konjuta kaptura iha área Comoro no Akadiru hun.
Tuir informasaun ne’ebé Media Democracia asesu husi pesoál servisu intelijénsia katak, Iha loron segunda (27/04) mais ou menus tuku 07.00 dadersan otl, ekipa halo operasaun hodi buka tuir suspeitu sira ne’e no to’o tuku 02.00 madruga mak foin kaptura iha área ne’ebé deskonfia halo tranzasaun atividade ilízitu droga ba, hafoin kaptura sidadaun hirak ne’e ekipa lori kedas ba iha Diresaun Servisu Investigasaun Kriminál Nasionál hodi halo investigasaun no detensaun.
Sidadaun hirak ne’e ho inisiál S, IP, YM, AF husi Indonesia no CF husi China. Ba kazu ne’e rasik rejistu ho Númeru Úniku Krime rua hanesan, NUK: 153/26 PNSIK no NUK: 155/26 PNSIK.
Enkuantu kazu ne’e rejistu ho NUK la hanesan tanba Ekipa konjunta Kaptura suspeitu la hanesan no iha fatin ne’ebé la hanesan.
NUK: 153/26 PNSIK ne’e mak Sidadaun ne’ebé komsumu no kaptura iha área Comoro no NUK: 155/26 PNSIK ne’e sidadaun ne’ebé fa’an ka halo tranzasaun iha área Akadiru-Hun.
Entretantu relasiona ho kazu ne’e Jornalista Media Democracia tenta halo konfirmasaun ho parte Komandu Jerál PNTL, maibé seida’uk hetan konfirmasaun tanba sei iha hela prosesu kontinuasaun ba iha investigasaun.
Reportajen: Estefánia Cardoso
Foto: Estefánia Cardoso