Dili, 02 Dezembru 2025 (Média Democracia) – Komandu Polísia Nasional Timor-Leste (PNTL) realiza atividade Kampaña Loron 16 Kontra Violensia Hasoru Feto No Labarik-Feto hanesan kampaña global ida ne’ebe hala’o husi loron 25 fulan Novembru to’o loron 10 fulan Dezembru tinan 2025. Atividade ne’e Média Democracia asesu husi pajina PNTL, Tersa semana ne’e.
Komandante Jerál PNTL Komisariu Jerál Polísia, Henrique da Costa iha diskursu hateten, serimonia ne’ebé hala’o iha loron Segunda-Feira (01/12) iha resintu Komandu Jerál PNTL ho tema “Hamutuk Hasa’e Konsiensia Literasia Digital no Online Seguru ba Feto no Labarik-Feto iha Diversidade Hotu-Hotu”
“Ha’u konvida ita hotu-hotu partikularmente ba Komandante sira ho ita-nia familia atu nune’e ita hasa’e ita-nia aktividade Kampaña Violénsia Kontra Feto no Labarik-Feto sira, iha atividade lubuk ne’ebé PNTL partikularmente husi Gabinete Igualidade Jeneru sempre involve-an iha aktividade, tantu husi parseiru sira konvida no husi komunidade sira konvida.” Dehan Komandante Jerál PNTL Komisariu Jerál Polisia Henrique da Costa
Komisariu Jerál hatutan, atividade ne’e sei halo Sensibilizasaun ba iha Eskola no Universidade sira oinsa bele koalia kona-ba Krime Violensia Domestika bele hasa’e konsiensia ema nian, nune’e bele hatene Violensia Domestika ne’e laos problema baibain maibé ida ne’e Krime Públiku nian no tenke hato’o keixa ba iha Polísia ka ba iha Autoridade sira atu nune’e bele prosesa.
Iha sorin seluk reprezentante Sekretariu Estadu Igualidade (SEI) aktual Diretor Jerál SEI, Armando da Costa hateten, lori Sekretariu Estadu nia naran hakarak kongratula PNTL ba inisiativa no Komitmentu ne’ebé la kotu hodi kontinua kombate Violensia Bazeia ba Jéneru iha forma oin-oin tuir Misaun PNTL ninian.
“Ohin ita tama ba loron hitu husi kampaña Kontra Violensia hasoru Feto no Labarik-Feto iha tinan ida ne’e, iha mós Mundu ka Globalmente foku ba Violensia Digital Bazeia ba Jéneru ho adopta tema Global and Digital Violence Again women and Girls ka Hapara no hakotu Violensia Digital hasoru Feto no Labarik-Feto, iha Timor-Leste, tinan ne’e ita adopta Tema ne’ebé foka liubá hasa’e konsiensia digital no online seguru ba Feto no Labarik-Feto iha diversidade hotu.” Hatutan reprezentante Sekretariu Estadu Igualidade (SEI) Diretor Jeral SEI Armando da Costa
Diretor Jerál (SEI) hatutan, konsiensia atu koñese saida mak Violensia Digital Bazeia ba Jeneru no nia tipu sira hotu, hatene mós asaun lubuk ida halo ba ema seluk liuhusi plataforma online sira ne’ebé durante ne’e konsidera hanesan buat baibain ida, maibé afinal asaun sira ne’e pertensia ba Violensia Digital Bazeia ba Jeneru.
Iha sorin seluk reprezentante Komandante TLPDP aktual Asesora, Julie Morgan, iha intervensaun hateten, hanesan parseiru, haksolok no orgullu hodi fó apoiu ba iha aktividade Kampaña ba iha Kontra Violensia Domestika nian iha tinan ida ne’e.
“Loron 16 ativizmu kontra Violensia Bazeia ba Jeneru nu’udar kampaña anual internasional ne’ebé hahu iha loron 25 Fulan Novembru, loron ida internasional nian hodi elimina violensia kontra feto no labarik feto ne’ebé hala’o iha loron 10 Fulan Dezembru nomos iha loron Direitus Umanus nian, kampaña ida ne’e hanesan tempu ida hodi istimula asaun sira hodi bele hapara violensia kontra feto no labarik feto sira iha mundu.” Dehan Asesora TLPDP, Julie Morgan
Asesora ne’e hatutan, haree kona-ba atividade loron 16 ativizmu kontra violensia bazeia ba jéneru hanesan kampaña anual internasional nian komesa husi 25 Novembru nune’e bele elemina violénsia kontra feto no labarik-feto iha rai laran ne’ebé sempre akontese.
Kampaña ne’e hanesan oportunidade ida ba ema idak-idak, organizasaun sira, komunidade sira atu halibur hamutuk no servisu hodi kria mundu ida ne’ebé livre husi violensia bazeia ba jéneru.
Esplika liután, atividade kampaña loron 16 ativizmu kontra Violénsia Bazeia ba Jeneru, organiza husi Gabinete Igualdade Jeneru no Inkluzaun PNTL, partisipa direita husi Komandante Jerál PNT nomos Segundu Komandante Jerál PNTL, akompaña husi Presidente AES-PNTL ho Vise AES-PNTL no estrutura Koordenador AES-PNTL Munisípiu 14 hamutuk ho Ofisias Superior PNTL, Komandante Munisípiu 14 ho Unidade tolu, repezenta husi F-FDTL, S.E.I, ONG nomos Parseiru TLPDP.
Reportajen : Nelfiano
Foto : Media PNTL