Díli, 20 Outubru 2026 (Média Democracia) – Polísia Nasionál Timor-Leste (PNTL) kontinua hala’o investigasaun kona-ba mate sidadaun Xineza, Tiago Chen, ne’ebé família bolu Lauchen, idade tinan 56, ne’ebé hetan mate iha tasi ibun Tasi-Tolu, Domingu (18/10). To’o agora, autoridade seidauk konfirma kauza husi mate, no sei hein rezultadu autópsia atu ajuda klarifika sirkunstánsia sira kona-ba kazu ne’e.
Komandante PNTL Munisípiu Díli, Komisáriu Asistente Polísia Orlando Gomes, informa, iha oras 07:00 dadeer, PNTL husi Eskuadra Dom Aleixo simu informasaun husi komunidade kona-ba isin mate ida ne’ebé hetan iha área tasi ibun Tasi-Tolu.
“Depois simu informasaun, patrulla PNTL bá kedas fatin akontesimentu atu asegura lokal no kontaktu ekipa forénsika. Depois ne’e, ekipa lori isin mate ba morgue Hospital Nasionál Guido Valadares (HNGV) atu halo autópsia,” dehan Orlando Gomes ba jornalista sira iha Eskuadra Dom Aleixo, Aimutin, Segunda-feira (19/10).
Nia hatutan, autoridade seguransa sei kontinua investiga kazu ne’e, tanba iha sinal balun ho kor mean ne’ebé observa iha matebian nia isin.
“Polísia bolu ona matebian nia feen ba Eskuadra Dom Aleixo atu rekolla informasaun. Ita sei bolu mós testemuña sira atu rona informasaun kona-ba kazu ne’e,” nia esplika.
Orlando Gomes afirma, depois rekolla informasaun hotu no simu rezultadu autópsia husi autoridade relevante, PNTL sei aprezenta kazu ne’e ba Ministériu Públiku (MP) atu prossegue tuir prosedimentu legál.
Iha sorin seluk, matebian nia kaben, Ana Paula dos Santos, konta katak, antes nia la’en lakon, sira hela hamutuk iha uma ho sira-nia oan sira.
Ana Paula esplika, iha kalan antes akontesimentu, sira han hamutuk, no nia la’en sei hela iha uma ho sira-nia oan na’in rua. Maibé, bainhira nia fila husi vizinhu, nia la hetan ona nia la’en iha kuartu laran.
“Bainhira hau fila husi vizinhu, hau la hetan ona hau-nia la’en iha kuartu laran. Maski karteira, telefone no xave motor sei hela iha uma, kalan ne’ebá ami han hamutuk no nia hela ho ami-nia oan na’in rua. Hafoin, hau sai ba vizinhu, no bainhira hau fila, nia la iha ona,” Ana Paula konta.
Tanba la hetan nia la’en, Ana Paula bolu sira-nia oan no membru família seluk atu buka Tiago iha área sira besik fatin ne’ebé sira hela, inklui área rai-hun no tasi ibun Kakeu-Laran. Maibé, sira la konsege hetan nia no fila fali ba uma.
Ana Paula mós konta, iha Sábadu (17/10/2026), nia sai ba vizinhu sira iha Besi Mean atu halimar. Bainhira fila ba uma, nia la hetan nia la’en, no sira-nia oan na’in rua hela mesak.
Iha Domingu dadeer, Ana Paula simu informasaun liuhusi telefone husi nia maun, Inácio, ne’ebé mak polísia, kona-ba ema ida ne’ebé hetan mate iha tasi ibun. Informasaun ne’e mak halo nia hatene kona-ba situasaun ne’ebé akontese ba nia la’en.
Nia afirma, durante sira moris hamutuk, la iha problema iha uma laran. Tanba ne’e, nia husu autoridade kompetente atu hala’o autópsia no investigasaun kle’an hodi determina kauza mate tuir prosedimentu legál.
Ana Paula mós husu atu matebian nia isin bele hakoi iha Timor-Leste, atu fasilita sira-nia oan sira bele vizita nia rate.
Tiago Chen, ne’ebé família bolu Lauchen, mak sidadaun Xina ho idade tinan 56 no servisu nu’udar karpinteiru.
Tuir informasaun husi família, Tiago mai Timor-Leste iha tinan 2012 no kaben ho Ana Paula iha tinan 2013. Sira hala’o kazamentu iha Igreja Katólika iha tinan 2016.
Kazada ne’e iha oan na’in tolu. To’o agora, PNTL kontinua hala’o investigasaun atu klarifika kauza mate no sirkunstánsia sira ne’ebé envolve matebian nia mate.
Reportajen : Estefania Cardoso
Foto: Estefania Cardoso