Díli, 20 Outubru 2026 (Média Democracia) – Polísia Nasionál Timor-Leste (PNTL) identifika ona suspeitu ho inisiál M, ne’ebé suspeita envolve iha kazu baku motorista no tuda kareta saneamentu iha área Rai Kotu, Tasi Tolu, iha Domingu kalan. Insidente ne’e akontese iha oras meia-noite, bainhira grupu joven ida halibur hela besik Pertamina, Rai Kotu.
Komandante PNTL Munisípiu Díli, Komisáriu Asistente Polísia Orlando Gomes, hateten grupu joven ne’e hahú tuda kareta ida, antes tuda kareta saneamentu ne’ebé lori fo’er ba fatin soe iha Tibar. Grupu ne’e mós baku motorista, ne’ebé relata kedas insidente ne’e ba PNTL iha Dom Aleixo.
Orlando Gomes hato’o informasaun ne’e ba jornalista sira iha Eskuadra PNTL Dom Aleixo, Aimutin, Díli, iha Segunda-feira (19/10).
Nia esplika, depois simu informasaun kona-ba insidente ne’e, patrulla polísia ba kedas fatin akontesimentu atu halo intervensaun no prevene situasaun ne’e sai grave liután.
“Vítima aprezenta ona keixa, no ita foti ona deklarasaun vítima nian, inklui deklarasaun husi sasin balun ne’ebé haree akontesimentu,” Orlando Gomes informa.
Nia hatutan katak, ekipa investigasaun kontinua hala’o investigasaun, inklui haree imajen CCTV, atu identifika ema sira ne’ebé suspeita envolve iha kazu ne’e.
Orlando Gomes konfirma polísia hetan ona informasaun kona-ba suspeitu ho inisiál M no submete ona pedidu mandadu kapturasaun ba autoridade kompetente.
“Ita kontinua hala’o investigasaun atu klarifika faktu sira no determina responsabilidade husi ema sira ne’ebé suspeita envolve iha kazu ne’e,” nia deklara.
Iha parte seluk, Prezidente Autoridade Munisípiu Díli (PAM-Díli), Fransisco dos Santos, liuhusi nia pájina Facebook, hato’o lamentasaun kona-ba insidente ne’ebé akontese ba funsionáriu saneamentu sira ne’ebé hala’o servisu iha kalan iha área Rai Kotu, Tasi Tolu.
Nia hateten funsionáriu saneamentu sira hala’o servisu iha kalan atu garante ambiente moos no saudável ba sidadaun hotu, inklui ema sira ne’ebé suspeita envolve iha insidente ne’e.
“Kuidadu, ami nia servisu ne’e atu halo ambiente moos, atu ita ho ita-nia família bele goza ambiente saudável. Maibé, imi tuda ami-nia ema sira to’o ran nakfakar, iha Rai Kotu, tuku 12 kalan,” nia hakotu
Reportajen: Octaviana da Costa
Foto: Octaviana da Costa