Dili 07 Setembru 2026 Média Democracia- Polísia Nasionál Timor-Leste (PNTL), Munisipiu Dili liu husi eskudra polisia Nain Feto realiza dialogu ho komunidade sira iha Suku Bidau Lecidere, Aldeia Lecidere, ho objetivu atu hakbesik liután relasaun entre PNTL no komunidade, no hamutuk buka dalan di’ak atu rezolve problema sosial ne’ebé akontese iha komunidade.
Tuir informasaun ne’ebé Média Demokrasia asesu iha pajinal ofisal PNTL katak, Dialogu ne’e realiza tanba iha insidente ida ne’ebé akontese iha oras madrugada, kuaze tuku 05:00, iha Aldeia Lecidere, Suku Bidau Lecidere, iha ligasaun ho insidente refere, PNTL halo aproximasaun ho komunidade no parte sira ne’ebé envolve, hodi promove komunikasaun, kompreensaun no buka solusaun ne’ebé bele ajuda prevene eskalasaun konflitu.
Inspetor Xefe Polisia Julio Maia, hato’o apelu ba komunidade atu mantém kalma, evita asaun sira ne’ebé bele aumenta problema no fó espasu ba prosesu legal atu hala’o tuir lei, tanba ne’e PNTL mos enkoraja komunidade atu uza mekanizmu dialogu no komunikasaun nu’udar dalan prinsipál atu rezolve diferensa no problema sosial sira.
Nia subliña, seguransa no estabilidade iha komunidade presiza responsabilidade hamutuk entre polísia no sidadaun sira. Tanba ne’e, kooperasaun no komunikasaun entre PNTL no komunidade sai fator importante atu prevene konflitu, proteje seguransa públika no garante ambiente dame.
Husi rezultadu dialogu ne’e, parte sira konkorda atu simu malu fali no kontinua moris hamutuk ho espíritu dame, respeitu no toleránsia, enkuantu prosesu legal ba kazu ne’ebé akontese sei kontinua tuir prosedimentu ne’ebé vigora.
Relasiona ho kazu refere, vítima sei aprezenta keixa iha loron tuir mai atu permite autoridade kompetente kompleta prosedimentu kriminal tuir lei no PNTL sei kontinua hala’o prosesu investigasaun no asegura katak kazu ne’e trata ho baze ba evidénsia, prosedimentu legal no prinsípiu justisa.
Inspetor Xefe Polisia Julio Maia reafirma, kompromisu atu kontinua hakbesik an ho komunidade, liuhosi dialogu, prevensaun no kooperasaun, hodi hametin seguransa no dame iha komunidade sira. Tanba ne’e PNTL mos apela ba komunidade atu fó apoiu ba autoridade sira no entrega problema sira liuhosi dalan legal, hodi evita konflitu no garante justisa bele lao ho di’ak.
Reportajen : Octaviana da Costa
Foto : Octaviana da Costa