Dili, 29 Abril 2025 (Média Democracia) – Prezidente Jose Ramos-Horta, simu Karta Kredensial husi Sr. CHUN Sovannarith, rezidente dahuluk Embaixadór Estraordináriu no Plenipotensiáriu Reinu Kamboja nian mai Timor-Leste.
Serimónia kredensial, ne’ebé hala’o iha Palásiu Prezidensial Nicolau Lobato, marka etapa istóriku iha relasaun diplomátika entre Timor-Leste no Kamboja. Estabelesimentu embaixada residente dahuluk Kamboja nian iha Dili hatudu parseria ne’ebé aumenta entre nasaun rua ne’e.
“Sr. CHUN lori esperiénsia diplomátika besik dékada tolu, inklui papel sira nu’udar Ministru-Konselleiru no Adjuntu Xefe Misaun ba Béljika, Olanda, Luxemburgu, Áustria, no Uniaun Europeia. Nia asumi kna’ar nu’udar Adjuntu Diretór-Jeral ba Departamentu Jeral ASEAN (GDA) iha Ministériu Negósiu Estranjeiru no Kooperasaun Internasionál Kamboja nian. Superviziona Relasaun Diálogu ASEAN no Timor-Leste nia adezaun ba Membru ASEAN.” Dehan PR iha Komunikadu imprensa palasiu Governu
Horta hatutan nu’udar sobrevivente rejime Khmer Rouge, Sr. CHUN nia servisu distintu halo nia simu Medalha Osan-Mean ba Servisu Distintu husi Samdech Techo HUN SEN no medalla THNAK MOHA SEREY WATH husi S.M. Liurai NORODOM SIHAMONI.
Prezidente Ramos-Horta fó benvindu ba Embaixadór CHUN no espresa apresiasaun ba Kamboja nia apoiu ne’ebé metin ba Timor-Leste, destaka signifikadu husi avansu diplomátiku ne’ebé loke dalan foun ba kooperasaun.
“Estabelesimentu embaixada rezidente Kamboja nian iha Dili reprezenta la’ós de’it formalidade diplomátiku ida, maibé kompromisu klean ba aprofundamentu husi ita-nia relasaun bilateral.” Afirma Prezidente Ramos-Horta
“Kamboja sai ona parseiru ida-ne’ebé folin-boot iha ita-nia viajen ASEAN nian, no ha’u fiar katak iha Embaixador CHUN nia lideransa, ne’ebé nia esperiénsia iha asuntu ASEAN partikularmente folin-boot ba ita, ita-nia nasaun sira sei harii ligasaun amizade no kooperasaun ne’ebé metin liután.” Dehan Prezidente Ramos-Horta
Timor-Leste no Kamboja fahe esperiénsia sira kona-ba ultrapasa dezafiu istóriku sira hodi harii sosiedade pasífiku no demokrátika, hodi kria fundasaun ida ba komprensaun no kolaborasaun ba malu.
Nomeasaun ba Embaixadór rezidente dahuluk Kamboja nian reprezenta avansu signifikativu iha relasaun diplomátika entre nasaun Sudeste Aziátiku rua ne’e no refleta importánsia Timor-Leste nian iha asuntu rejionál sira.
Reportajen : Domingas
Foto : Media Officer PR