Ainaro, 15 Outubru 2025 (Média Democracia) – Família defisiénsia husi Aldeia Querudo, Suku Mulo, Postu Hatubuilico, Munisípiu Ainaro, ne’ebé hetan tulun humanitáriu husi Prezidente Repúblika, J. Ramos-Horta, agora fila-fali ona ba knua hela fatin ho kondisaun di’ak, hafoin trataamentu durante fulan ida iha HNGV-Díli.
Avo Armando Amaral de Deus (49) hateten, ne’ebé moras matan tinan 20 resin ona no nia oan feto Joselina de Deus, defisiénsia fíziku, hetan infeksaun kanek iha kotuk laran tanba monu besik iha ahi-matan. Kondisaunn moras ne’e sai grave liu wainhira oan feto Joselina nia isin sa’i infeksaun bo’ot. Sira hela iha uma ne’ebé didin ho rai mutin taka ho du’ut manlai no laiha naroman ruma, iha situasaun defisil tebes no perigu ba sira nia moris loronloron.
Inisiativa ne’ebé sira rua deside hamutuk maka hakarak ba konsulta iha “matan-do’ok” (Kuku). Maibé Parteira Zélia da Silva de Jesus hetan sira iha dalan, hodi bolu sira ba nia uma fó asisténsia médikal ba sira. Ho inisiativa rasik nia publika informasaun ne’e iha rede sosiál, ne’ebé sai virál to’o ba Prezidente Ramos-Horta, iha kalan ne’e kedas Prezidente orienta urjensia ba ekipa Apoiu sosiál Prezidénsia nian.
Koordenadora Jerál Unidade Serbisu Apoiu Sosiál Prezidénsia, Teresa dos Santos Ximenes, ne’ebé akompaña direta família defisiensia relata.
Momentu ne’e, Excelência Prezidente Ramos-Horta manda mensajen urjente iha kalan ne’e kedas no dadersan ha’u kontaktu ho Doutór espesialista Prezidénte nian Dr. Ariel & Dra. Yasmin, hodi garante transporta médiku ba Avo Armando no nia oan feto Joselina iha Ainaro, nune’e ekipa desloka kedas ba iha HNGV-Dili.
Durante fulan ida iha HNGV, doutór sira halo operasaun mós ba avo Armando nia matan (matan-katarak) no trata oan feto Joselina saúde. Agora, sira nain rua iha kondisaun di’ak no fila ona ba sira nia hela fatin. Parteira Zélia da Silva de Jesus, ne’ebé primeiru hetan sira nain rua iha dalan, agradese ba Prezidente nia laran di’ak ba sidadaun refere.
“Ha’u agradese tebes ba nai Prezidente José Ramos-Horta tanba ho nia domin tomak mak bele lori hikas sira nain rua mai fali iha ne’e, Avo Armando nia matan komesa hare fila-fali ona no Josefina mos sa’ude diak loos ona.” Hateten Parteira Zelia iha Ainaro.
Prezidénsia garante mós atu konstrui uma di’ak ida ba sira, atu bele hela dignamente iha komunidade. Autoridade lokál, Superson Mendonça, simu fali sira nain rua ho laran kontenti no husu mós ba Governu atu kontinua fó mós prioridade ba família defisiénsia seluk iha Aldeia Querudo, ne’ebé família uma kain liu 30 mak sei hela iha kondisaun susar no seidauk asesu ba eletrisidade, dalan husi fatin refere mós seidauk iha no presija la’o ain durante oras ida resin atu to’o dalan nasionál.
Reportajen : Média PR
Foto : Média PR