Dili, 11 Marsu 2025 (Média Democracia) – Relasiona ho rekrutamentu Polísia Nasionál Timor-Leste (PNTL) tinan 2025 anúnsia rekrutamentu vaga 500, tanba ne’e Organizasaun Naun-Governamentál Hali Ba Dame (HABADA), realiza konferénsia Imprensa hodi Promove Tranparénsia no Igualdade iha Rekrutamentu PNTL tinan 2025
Fundadór nomos Diretór Ezekutivu ONG Hali Ba Dame (HABADA) Abel Amaral halo intervensaun hateten, bazeia ba anúnsiu rekrutamentu vaga 500, ne’ebé vaga 400 ba kursu formasaun ajente (postu ajente) no vaga 100 ba kursu formasaun ofisiál (Postu Isnpetór-Asistente) ba polísia nasionál Timor-Leste.
“Iha tinan 2025, Governu aprova liuhusi Rezolusaun Governu N.º 9/2025 loron 12 fulan Fevereiru. Nune’e HABADA apela ba autoridade kompetente sira atu garante prosesu transparente, justu no inkluzivu, hodi promove oportunidade hanesan ba kandidatu hotu-hotu.” Hateten Diretór Ezekutivu HABADA Abel Amaral iha nia edfísiu Tali Laran, Comoro, Tersa ne’e
Nia salienta katak nu’udar organizasaun ida ne’ebé iha kompromisu atu promove governasaun demokrátika no direitus umanus, HABADA repete importánsia atu garante katak rekrutamentu tuir prinsipiu meritokrasia, integridade no reprezentasaun sosial.
“Iha kontestu ida-ne’e, ami destaka pontu fundamental sira hanesan, Transparénsia iha Prosesu Selesaun, Publikasaun kritériu admisaun no avaliasaun ne’ebé klaru, Fornesimentu informasaun kona-ba etapa sira konkursu nian no ninia prazu sira, Monitorizasaun independente husi organizasaun sosiedade sivil sira.” Salienta Nia
Nia haktuir katak iha oportunidade hanesan, promosaun ba partisipasaun mane no feto ne’ebé hanesan, Inkluzaun ba kandidatu sira husi rejiaun no grupu sosial hotu-hotu, Adota medida sira hodi prevene diskriminasaun no favoritizmu ne’ebé la justu.
“Kritériu rekrutamentu bazeia ba kompeténsia no integridade, Avaliasaun rigorozu ba formasaun akadémiku no abilidade fíziku sira, Verifikasaun antesedente atu garante integridade no kompromisu ba valor demokrátiku sira, Treinamentu adekuadu kona-ba direitus umanus no polisiamentu komunitáriu.” Haktuir nia
Tanba ne’e, Diretór Ezekutivu Organizasaun Naun-Governamentál HABADA husu ba Ministériu Interior no Komando Polísia Nasionál Timor-Leste atu hametin mekanizmu responsabilizasaun no garante katak rekrutamentu 2025 kontribui ba forsa polísia ida ne’ebé profisional, efisiente no reprezentativu husi diversidade Timor-Leste nian, nune’e mós HABADA sei kontinua akompaña prosesu no enkoraja sidadaun sira-nia partisipasaun hodi akompaña momentu importante ida-ne’e ba seguransa públika nasaun nian.
Diretór HABADA akresenta katak durante sira akompaña tuir planu Ministériu Interior nian katak Governu iha duni komitmentu ba programa tolu ne’ebé importante tebes ba Institutu PNTL.
“Ministériu interior iha komitmentu ba iha programa 3 ne’ebé sei halo mak hanesan, 1 promosaun, 2 reforma ba PNTL sira neebé idade tama ona ba idade reforma no 3 mak rekrutamentu no ami fiar katak ministeriu interior iha komitmentu atu implementa kona-ba ida ne’e tanba ami haree durante ne’e sua eselénsia Ministru Interior ho Komandante Jeral sira vizita direitamente ba komandu Munisípiu sira, ida ne’e mak habadak pontu de vista katak Ministeriu Interior iha komitmentu duni atu halo rekrutamentu bazeia ba nesesidade ne’ebé instituisaun PNTL presiza.” Akresenta Nia
Iha biban ne’e mós Organizasaun Naun-Governamentál Hali Ba Dame (HABADA), apresia los ba polítika governu nian, liliu ba Ministériu Interior ne’ebé atu halo rekrutamentu, inklui mós kona-ba promosaun díviza tranzitóriu, depois de reforma sira, no iha polítika atu halo rekrutamentu hodi subtitui ida ne’ebé reforma hodi aumenta ba iha parte ne’ebé sei presiza membru PNTL foun.
Nia mós husu ba Polísia Nasionál Timor-Leste liuliu ba komisaun rekrutamentu PNTL 2025, bainhira atu rekruta tenke transparante, hadook husi politizasaun no independente no tenke rigor ba iha joven feto no mane ne’ebé atu kompete iha vaga rekrutamentu refere.
“Depois ba komisaun rekrutamentu ba kadetis ne’e ita husu ba sira para atu rigor ba joven feto ka mane ne’ebé atu tama iha rekrutamentu ne’e sira labele envolve iha kualker grupu ida, se kuandu sira envolve karik komandu tenke aviza ba sira tenke deklara atu husik grupu sira ne’ebé sira afilia ates tama ba instituisaun PNTL, tanba bainhira sai ona membru PNTL ne’e signifika katak ita hakruuk de’it ba lei no orden laiha ona grupu A,B,C ne’ebé ita hotu akompaña.” Nia esplika
Hali Ba Dame mós sei akompaña rekrutamentu refere tenke moos, transparante, labele iha politizasaun no labele iha involvimentu grupu sira ne’ebé durante ne’e sai polémika.
Reportajen : Estefania
Foto : Estefania