Dili, 24 Juñu 2026 Media Democracia- Lideransa Igreja Katólika iha Timor-Leste, mak kompostu husi Dom Virgílio Cardeal do Carmo da Silva, Dom Leandro Maria Alves no Dom Norberto do Amaral, iha Tersa Feira ne’e presta omenajen ikus ba saudozu Francisco Guterres Lú-Olo iha nia rezidénsia iha Farol, Díli. Omenajen ne’e hatudu respeitu no solidariedade Igreja Katólika nian ba lider nasional ne’ebé kontribui boot ba luta libertasaun no dezenvolvimentu Timor-Leste.
Bispo Diocese Dili, Dom Virgilio Cardeal do Carmo da Silva hatete, lori igreja Timor-Leste nia naran hodi fo agradese ba Saudozu nia sakrifisiu husi luta iha ai laran too mai ukun rasik aan no Timor-Leste hetan independénsia nia kontinua dedika nia an hodi harii nasaun ida ne’e
“Ami na’in tolu hamutuk amu sira lori igreja nia naran mai primeiru atu agradese ba nia agradese ba nia ba ninia sakrifisiu hotu ne’ebé nia halo ba rai ida ne’e too ukun rasik an, mesmu ita ukun rasik an tiha kna’ar hotu ne’ebé nia lori hodi kontinua lori harii rai ida ne’e nasaun ida ne’e entaun ita iha obrigasaun atu agradese ba sakrifisiu hotu ne’ebé nia halo tiha ona ba ita” dehan Dom Virgilio Cardeal do Carmo da Silva iha Residénsia matebian Francisco Lú-Olo farol Díli, (23/6/2026).
Alende fó presta homenajen ba matebian Francisco Guterres no mos reza ba familia ne’ebé saudozu husik hela hanesan faluk oan sira hodi nafatin korajen iha nia familia ida ne’e
“Segundu ita mai mos atu reza hamutuk hanoin katak liu-liu momentu hanesan ne’e ida ne’ebé familia nia kaben no oan nain haat los duni sira lakon sira nia aman ho momentu ne’ebé difisil teb-tebes maibé ita nia prezensa hamutuk iha ne’e hatur ita nia solidaridade liu-liu hodi reza ba sira atu iha momentu susar nia laran sira mos forti nafatin hodi hasoru iha momentu ida ne’e iha sira nia moris” Dom Virgilio haktuir
Enkuantu misa funebre ba Saudozu Francisco Guterres “Lú-Olo” sei dirije husi Bispo Diocese Baucau, Dom Leandro Maria Alves iha igreja Katedrál Dili iha loron 26 ne’e
“Agora atu koalia konaba misa funebre tanba ohin familia mos husu ami determina tiha ona katak Bispo Baucau mak sei preside misa ida ne’e iha sesta feira iha igreja Katedrál, hau ata labele tanba aban hau desloka ba Roma tanba iha inkontru ida iha Amu papa konvida inkontru iha Roma entaun aban hau tenke ba maibé nu’udar igreja ami nain tolu mai tiha ona agora Amu Dom Leandro hamutuk ho Amu lulik sira seluk ne’ebé sei disponivel prontu atu bele selebra misa ikus nian iha sesta feira, 11 meia iha Katedrál ninian” nia hakotu
Reportajen : Tomás dos Santos
Foto: Tomás dos Santos