Díli, 24 Juñu 2026 (Media Democracia) – Eis-Prezidente Repúblika no Eis-Primeiru-Ministru, Taur Matan Ruak, hato’o nia tristeza kle’an ba faleseimentu saudozu Francisco Guterres Lú-Olo, ne’ebé nia konsidera nu’udar líder disiplinadu no ema ida ho valór boot ba nasaun. Tanba durante nia moris tomak, Lú-Olo dedika aan ba luta libertasaun, unidade nasional no dezenvolvimentu Timor-Leste, hodi husik hela ezemplu di’ak ba jerasaun foun sira.
Eis-Prezidente Repúblika no Eis-Primeiru-Ministru, Jenerál Taur Matan Ruak, hato’o nia tristeza kle’an kona-ba partida Francisco Guterres “Lú Olo”, ne’ebé nia konsidera nu’udar ema di’ak ida no líder disiplinadu ne’ebé fó kontribuisaun boot ba rai no povu Timor-Leste, l
”Dalan mak ida ne’e duni Distinu sempre hafahe ita maibé ami fó obrigadu ba Saudozu Francisco Guterres Lú-Olo tanba nia Kontribuisaun bá rai no povu ida-ne’e liuliu bá jerasaun foun sira boot tebés,” dehan Eis-Prezidente Repúblika (PR), no Eis PM Taur Matan Ruak ba jornalista sira iha maktoban nia rezidénsia Farol Díli, (23/6/2026)
Eis PM hatutan, ida ne’ebé sei moris banati tuir Saudozu Francisco Guterres “Lú-Olo” nia ain fatin lori Timor bá oin lider sira tenke hamutuk atu kombate povu nia moris kiak no mukit.
” Ita nia povu sei mizereia iha nia rain, ita hetan ukun-an ona maibé povu seida’uk moris di’ak sei mizereia hela tanba ne’e mak ami ne’ebé mai husi Ai-laran, ami espresa ami nia sentimentu bo’ot ba no profunda ba nia feto faluk no oan kiak sira la mesak ami hotu iha sira nia sorin” hatutan Jenerál Taur Matan Ruak.
Saudozu Francisco Guterres Lú-Olo Rai hela fitar ida bá líder sira, líder seluk ne’ebé sei moris ho nia aten brani no disiplina sai exemplar bá líder sira hotu-hotu atu bele haré povu ida ne’e ho di’ak, bu’at ne’ebé ladiak halakon, halo buat ne’ebé di’ak ba jerasaun foun sira.
Nia dehan, na’inn rua ba hotu halo tratamentu iha hospital, maibe antes Eis PM Tau Matan Ruak fila hameno hela liafuan katak sira hotu la haluha Francisco Guterres “Lu-Olo” maibe realidade mai ho kondisaun ne’ebé toba hakmatek ona halo povu Timor-Leste, lakon saudades no tristeza ne’ebé boot
“Ami nain rua ba hotu ospitál nia hela ha’u fila no antes ha’u fila ha’u hameno liafuan ida katak ami hotu la haluha nia ami hamutuk ho nia nafatin, saida de’it mak mai ami simu nafatin iha momentu ami hakuak ikus antes nia desloka ba Malázia ami hanoin nia atu fila maibé nia bá ona, distinu si’ak foti nia, ami ne’ebé sei moris forsa nafatin hodi hare’e ba ita-nia povu ,” Eis-Xefe Estadu dehan.
Ohin povu tomak mai konsentra iha ne’e atu fo Omenajen halo orasaun ba nia atu nune’e nia klamar bele hetan fatin di’ak iha moris rohan laek.
”ita sira ne’ebé sei moris lori ita nia moris ba oin, ba nia hotu ona maibé ba ita sei todan tanba buat hotu ninian nia lori lisuk no tutur ba ona hela rai hela kanek ne’e mai ita liu-liu ba imi jerasaun foun sira.”nia hakotu
Reportajen : Tomás dos Santos
Foto: Tomás dos Santos