Dili, 03 Fevereiru 2026 (Média Democracia) – Sekretariu Estadu Komunikasaun Sosial SEKOMS hala’o sorumu hodi aprezenta Prezidente Foun Radiu Televizaun Timor-Leste RTTL, nune’e bele hala’o kanar iha Radiu Televizaun Timor-Leste RTTL to’o tinan 2031. Termu entrega ne’e hala’o iha salaun RTTL Caicoli Dili, Tersa semana ne’e.
Sekretariu Estadu Komunikasaun Sosial SEKOMS, Expedito Loro Dias Ximenes hateten, ohin loron mai partisipa iha termu entrega entre prezidente RTTL sesante Elizeu no Prezidente RTTL foun Rosario Graca de Maia.
“Ohin ha’u mai partisipa iha atividade termu entrega entre Prezidente RTTL foun no Prezidente sesante ne’ebé buat hotu lao normal atu prezidente foun bele hatene servisu saida mak halo ona no sai mak sei kontinua, nune’e buat balun seidauk kompletu prezidente foun bele kontinua hadia di’ak liután no lori RTTL ba oin.” Dehan Sekretariu Estadu Komunikasaun Sosial SEKOMS, Expedito Loro Dias Ximenes
Sekretariu Estadu hatutan, iha termu entrega partisipa maximu husi funsionariu RTTL hotu-hotu nune’e husu ba funsionariu sira marka prezensa hodi rona diretamente liafuan balun husi SEKOMS nomos Prezidente no foun prezidente sesanti nian.
“Ha’u sente ksolok, tanba prezidente foun hato’o nia vizaun no misaun no komprimisiu oinsa lori RTTL ba oin tuir dekretu lei 42/2008 ne’ebé regula kona-ba transformasaun RTTL husi servisu publiku ba empreza publiku tantu ida-ne’e hanesan lei ne’ebé regula funsionamentu RTTL nian.” Hatutan Sekretariu Estadu Komunikasaun Sosial SEKOMS
Sekretariu Estadu afirma, ohin prezidente sesante hato’o mós hanoin katak hanesan joven husu ba lideransa foun atu kontinua obra ne’ebé halo ona, buat ne’ebé di’ak kontinua no ida ne’ebé la di’ak husik hela, tanba iha instituisaun media sempre iha dezafiu barak. Nune’e prezidente foun mós rekoñese no presiza servisu hamutuk hodi RTTL ba oin.
Iha fatin hanesan Prezidente RTTL foun, Rosario Graca de Maia hateten, ba dahuluk hakarak agradese ba IX Governu konstituisional liuhusi Sekretariu Estadu Komunikasaun Sosial SEKOMS ne’ebé fó fiar atu lidera Radiu Televizaun Timor-Leste RTTL.
“Ha’u hanoin katak Radiu Televizaun Timor-Leste RTTL iha progresu ne’ebé progresivu ho nune’e ha’u mai atu kontinua de’it obra prezidente sesante Sr. Elizeo nomos prezidente sira seluk halo ona iha tinan ba kotuk nian, inklui dedikasaun funsionariu hotu-hotu iha RTTL. Ha’u nia preoridade ida mak fortelesimentu instituisional ita koalia kona-ba harmoniza baze legal sira atu fó biban ba RTTL atu hala’o nia kna’ar tuir vizaun no minsaun.” Dehan prezidente atual RTTL Rosario Graca de Maia hatete
Prezidente atul hatutan, iha fortelesimentu instituisional atu fó RTTL iha biban atu hakonu diretu no deveres trabllador nian. Nune’e atu fó biban RTTL atu sai instituisaun ne’ebé dinamiku hodi kria ambiente ne’ebé profisinal no etiku. Ho fortelesimentu instituisional fó biban ba RTTL halo nia expansaun ba nia programasaun rasik
Iha sorin seluk prezidente sesante RTTL, Elizeu Isaac Fernandes hateten, agredese tebes ba Sekretariu Estadu SEKOMS, tanba fó ona oportunidade hodi lidera RTTL durante tinan ida nia laran.
“Ita hotu-hotu hatene nia prosesu katak ha’u simu fali pose ida iha partidu nune’e lei la fó dalan ba ha’u atu dupla servisu rua ne’e, entaun Konsellu Ministru deside subtitui fali sr. Rosario hodi lidera Instituisaun RTTL to’o tinan 2031. Hanesan sidadaun Timoroan sente kontenti bainhira ha’u simu pose mai servi direita iha RTTL, agora mós ha’u sente kontente, tanba ha’u bele fó kontribuisaun pozitivu dezenvolvimentu ba RTTL lori fó desiminsaun informasaun ba povu no estadu.” Dehan prezidente sesante RTTL, Elizeo
Prezidente sesante hatutan, esperansa no desezu RTTL tenke susesu, tanba ho lideransa senior sei halo atinjimentu buat foun ruma maske la milagre hamutuk ho forsa matenek ne’ebé RTTL iha nanis ona sei apoiu malu bele lidera di’ak liután RTTL iha mandatu ida-ne’e.
Reporatjen : Nelfiano
Foto : Nelfiano