Dili, 13 Agustu 2026 (Media Democracia)- Selebrasaun loron Forsa Armada Libertasaun Nasionál (FALINTIL) ba dala-51 tinan ne’e, sei halo iha foho Matebian hodi fó ondra ba martir sira.
Xefe Estadu Maiór Jenerál Forsa Armada (XEMGFA), Tenente Jenerál Domingos Raul ‘Falur Rate Laek’ hatete, razaun Komandu F-FDTL hili foho Matebian sai fatin ba komemorasaun FALINTIL ba dala 51 tanba matebian nu’udar foho lulik nasaun Timor nian, iha tempu pasadu, ema rihun ba rihun hetan refújiu no fatin esperansa nian.
“Iha ne’ebá mós, pájina ida ne’ebé maka todan liu husi ita-nia jornada luta libertasaun nian. Refujiu no trajédia koeziste, tanba ne’e, iha foho ida ne’e, hanesan sofrimentu no reziliénsia koeziste iha povu timoroan tomak nia klamar.” Dehan Jenerál Falur iha nia intervensaun bainhira prezide Marsa FALINTIL hodi komemora loron FALINTIL ba dala-51 ne’ebé hala’o iha Kuartel Jenerál F-FDTL Fatuhada kinta ne’e.
Falur hateten, tema ba selebrasaun loron FALINTIL tinan ne’e mak ho tema “Onra ba Mártir sira, Kompromísiu ba Estabilidade no Dame”.
“Fó onra ba mártir sira la’ós jestu simples nostaljia nian, nu’udar devér memória ativa, neʼebé impoin ba jerasaun atuál, responsabilidade solene atu salvaguarda buat ne’ebé husik hela mai ita, mak soberania no pás.” Dehan Nia
Iha Biban ne’e, Xefe Estadu Maior konvida sidadaun hotu atu halo reflesaun iha ámbitu selebrasaun loron FALINTIL ba dala-51.
“Iha kualidade ida-ne’e mak ha’u konvida Ita-Boot sira no foin-sa’e sira hotu neʼebé prezente atu halo reflesaun tuir dalan, kona ba ita-nia kapasidade atu reziste.” Nia afirma.
Nia mós husu ba veteranu sira hamutuk no populasaun hotu atu fó ondra ba mártir sira iha ámbitu loron FALINTIL ba dala-51.
“Nune’e mai ita kontinua, unidu, veteranu no foin-sa’e sira, ho farda no mochila estudante nian, ba Matebian, ho serteza katak ita fó onra di’ak liu ba mártir sira bainhira ita harii, ho ita-nia liman rasik, dame no estabilidade ne’ebé sira luta hodi husik hela.” Nia hateten
Reportajen: Estefania Cardoso
Foto: Pájina Ofisiál F-FDTL