Díli, 13 Jullu 2026 (Media Democracia) – Joven ida ho naran Imanuel Castelanu, orijen husi Munisípiu Baucau, Postu-Administrativu Laga, Suku Soba, Aldeia Butufau, ne’ebé agora dadaun hela iha Kuluhun, Aldeia Nato, kontinua hala’o servisu hanesan tekniku eletróniku hodi hadia telefone aat, troka layar, bataria no asesóriu sira iha área Palásiu Governu oin hodi sustenta nia moris loron-loron.
Durante entrevista ho, Imanuel katak servisu iha fatin ne’e kleur ona no ajuda nia atu hetan rendimentu, maski la boot.
“Ha’u kada loron mai hein ih Palásiu Governu oin hahu tuku 9 dadeer to’o tuku 6 loraik. Rendimentu ne’ebé ha’u hetan la boot; dala barak hetan US$15 to’o US$25 kada loron. Maibé ida ne’e la hamate ha’u nia espiritu servisu, tanba esperiénsia ne’ebé ha’u aprende husi kolega sira fó forsa ba ha’u atu kontinua,” dehan Imanuel. Iha palasiu Governu oin (09 Jullu 2026).
Nia esplika tan katak iha tinan 2021 nia hahú aprende hadia telefone husi nia kolega ida naran Marsal iha área Largo. Depois aprende no hetan esperiénsia sufisiente, deside hamrik mesak hodi buka rendimentu rasik no hili fatin servisu iha Palásiu Governu nia oin.
“Ha’u hahú ho hahu osan US$10 de’it. Husi ne’ebá ha’u kontinua dezenvolve servisu to’o ohin loron. Agora ha’u bele hadia telefone ho servisu hanesan troka layar, troka bataria no reparasaun seluk,” nia hateten.
Maski nune’e, Imanuel afirma katak hasoru difikuldade boot tanba seida’uk iha fatin permanente atu hala’o nia negósiu. Nia dehan bainhira autoridade munisipál sira halo fiskalizasaun, nia tenke husik servisu no muda ba fatin seluk.
“Difikuldade boot liu mak ami laiha fatin permanente. Dala barak bainhira autoridade mai, ami tenke husik servisu no lao ba fatin seluk. Ami hanesan Timor oan buka de’it dalan atu sustenta moris, tanba seidauk iha oportunidade servisu sufisiente,” nia dehan.
Mensajen ba maluk joven sira mak labele tauk no moe atu aprende no aplika esperiénsia ne’ebé ita iha. Agora mudansa barak ona, no importante liu mak ita kria rasik kampu servisu ba ita nia futuru. Idade kontinua aumenta, entaun tenke iha vontade atu servisu no la depende de’it ba ema seluk.
Reportajen: Nicodemos
Foto: Lourenço