Dili, 02 Fevereiru 2026 (Média Democracia) – JSMP Timor-Leste nia komunikadu imprensa kona-ba Autoridade Tribunál Esplora vantajen meiu komunikasaun hodi komunika ho parte intervienente sira relasiona ho adiamentu ba julgamentu. Komunikadu refere asesu husi pajina JSMP, Segunda feira semana ne’e.
Diretora Ezekutiva JSMP Ana Paula Marçal hateten, iha 12 to’o 15 Janeiru 2026, Tribunál Judisiál Primeira Instánsia Baucau iha ona ajenda ba julgamentu ba kazu sira ne’e marka ona atu realiza julgamentu, bazeia ba oráriu ne’ebé fiksu, iha loron 12 fulan Janeiru Tribunál sei julga kazu hamutuk sanulu-resin-ida (11) no iha loron 13 fulan Janeiru sei julga kazu hamutuk sanulu-resin-ida (11), iha loron 14 fulan Janeiru sei julga kazu hamutuk lima (5) no iha loron 15 fulan Janeiru sei julga kazu ida (1). Totál kazu ne’ebé sei julga hamutuk tolu-nolu-resin-ida (31).
“Kazu sira ne’e labele realiza julgamentu, tanba iha Dezembru 2025, Ministériu Públiku Baucau antisipadamente hatama ona pedidu ba tribunál atu halo adiamentu ba julgamentu, tanba iha data fiksadu hirak-ne’e majistradu Ministériu Públiku sira hotu sei partisipa atividade retiru anual Ministériu Públiku nian iha Oe-cusi.” Dehan Diretora Ezekutiva JSMP Ana Paula Marçal
Diretora afirma, tuir fonte informasaun husi ofisiál justisa ne’ebé JSMP asesu katak, iha momentu ofisiál dilijénsia simu karta husi seksaun sentrál kona-ba Ministériu Públiku ninia pedidu ba adiamentu ne’e, ofisiál dilijénsia sira imediatamente haruka karta pedidu ne’e ba juis titulár sira hodi hasai despaixu ba adjuntu eskribaun direitu sira atu re-notifika intervienente sira ho urjente, nune’e ofisiál dilijénsia sira halo kontaktu ho intervienente sira liuhusi telefone hodi informa kona-ba adiamentu refere, enkuantu hein karta notifikasaun foun husi tribunál durante loron haat (4) JSMP nota katak la iha intervienente ruma mai iha tribunál atu tuir julgamentu.
“JSMP apresia tebes ho meiu komunikasaun ne’ebé tribunál Baucau halo ba iha parte intervienente sira, tanba ho meiu ne’e bele redus gastu husi intervienente sira.” Hatutan Diretora Ezekutiva JSMP
Diretora informa, antes ne’e JSMP rekomenda ba parte Tribunál atu kontinua halo komunikasaun antes ba intervienente sira bainhira tribunal iha impedimentu atu realiza julgamentu tuir ajenda ne’ebé marka ona.
Esplika liután JSMP rekomenda ba tribunál sira atu nafatin mantein komunikasaun tuir evolusaun éra globalizasaun hodi esplora vantajen pozitivu husi era meiu komunikasaun oioin ne’ebé gratuita hodi asegura funsionamentu servisu Tribunál nian ho efikasia no nafatin garantia konfiansa sosiédade en-jerál ba iha tribunál.
Reportajen : Nelfiano
Foto : Media JSMP