Oe-cusse, 29 Janeiru (Média Democracia) – Komunidade husi Aldeia Suku Bobometo sub Rejiaun Oe-silo Rejiaun Administrativa Espesial Oé-cusse Ambeno, ukun-aan durante tinan ruanulu-resin ona, nafatin asesu bee moos ho distansia ne’ebé dook ho kilometru ida liu hodi sustenta ba nesesidade loron-loron nian
Tuir komunidade Mariana Delfina Oki hateten, kada loron atu asesu bee moos tenke lao ho kilometru ida liubá too iha bee-matan Welvibon tanba ne’e kada loron tenke lori masa 5 litru 3 hodi ba kuru bee, nune’e bele sustenta ba nesesidade familia nian
“Entaun kada loron ami tenke lori de’it masa 5 litru ne’e 3 tanba tuir forsa de’it karik lori liu ida ne’e forsa laiha tanba husi bee-matan fila ba uma tenke sae foho iha oras ida nia laran hafoin bele to’o iha uma entaun loron ida mai tenke masa tolu ne’e uza ba tein, fase bikan, no hemu, problema ida ne’e maka durante ne’e ami komunidade iha aldeia Saben infrenta.” Dehan Komunidade, Mariana Delfina Oki
Nia hatutan durante iha tinan barak nia laran ona komunidade Aldea Saben infrenta, sempre ba kuru bee moos iha bee-matan Welvibon maibé ho distansia ne’ebé dook tebes husi hela fatin ne’e ba to’o iha bee-matan tenke han oras ida liu.
“Bee matan Welvibon durante ne’e ami uza de’it ba han hemu nian maibé atu fase ropa foer no haris loron-loron nian tenke lao ain ba mota. Tanba bee iha mota labele sustenta ba nesesidade loron-loron nian tanba iha ema balun hela iha mota-ulun no animal barak mak halo foer bee iha mota entaun durante ami uza de’it ba haris no fase ropa.” Dehan nia
Nia salienta, atu hatoo mós rekomenda ba parte relevante sira liu-liu governu bele tau matan hodi haree kona-ba problema bee moos, tanba durante tinan barak ona sira infrenta, nune’e ba futuru bele asesu bee moos ho di’ak.
Iha fatin hanesan Xefe Departementu Servisu Agua no Saneamentu (SAS) Oe-cusse Yosep Ili hatan ba problema bee moos, durante ne’e komunidade iha Aldeia Saben infrenta maibé iha tinan 2021 nia laran halo ona perfurasaun iha mota Noelekta ho tanki Bomba Rua no sira sei kontinua halo tan tanki ida hodi distribui ba komunidade sira iha Aldea Saben.
“Komesa husi 2020 to’o 2021 ita halo perfursaun iha mota Noelekta, ho total orsamentu atus-tolu liu halo perpursaun ho tanki rua iha 2023 nia laran, ami mós tau tan osan kontinua halo tanki ida distribuisaun komunidade sira iha saben. Tanki ida sei distribuisaun ba Oe-silo vila nomos tanki ida iha Noelekta nian sei distribui ba komunidade sira aldeia Tumin nian.” Dehan Xefe Departementu Servisu Agua no saneamentu (SAS) Oe-cusse Yosep Ili
Nia hatutan liga ho aldeia saben nian durante ne’e servisu sei hala’o hela no Bomba mós lao nafatin no tenkniku sira sei loke bee moos ba komunidade sira ne’ebé hela iha Aldeia Saben sei lao tuir orariu kada semana ida dala 1, hodi atende ba nesesidade nian bainhira iha tempu bailoro-naruk.
“Durante ne’e Servisu Agua Saneamentu hala’o komesa husi tinan 2000 mai to’o agora relasiona programa no sistema sira ne’ebé SAS implementa iha Oe-cuse Ambeno totál hamutuk atus-ida ualunulu (180) maibé husi programa hirak ne’e 50 resin mak sei funsiona hela.” Dehan Xefe Departamentu SAS
Esplika kle’an liután katak iha Suku Bobometo Sub rejiaun Oe-silo Rejiaun Especial Oe-cusse Ambeno ho nia populasaun hamutuk, rihun-sia atus-sia limanulu-resin-ida (9951) ho nia uma-kain hamutuk rihun-rua atus-tolu ualunulu-resin-neen (2386) tuir dadus sensus tinan 2022 nia laran.
Reportajen : Nelfiano
Foto : Nelfiano