Dili, 09 Janeiru 2025 (Média Democracia) – Jacinta Monis Pereira ho idade 25 mai husi Munisípiu Bobonaro Suku Malubu Aldeia Mali-ubu, daudaun ne’e hela iha Tasi-Tolu área Karentina, loron-loron sempre halo atividade negosiu ki’ik iha trotoar leten hodi responde ba nesesidade no apoiu alin ba kursu.
Negosiante Jacinta Monis Pereira hateten, durante ne’e uza osan 70 dolar moris hanesan ema negosiante hodi halo atividade negosiu ki’ik hanesan fa’an sigaru no pulsa iha trotoar leten nune’e bele hetan osan ituan hodi sustenta ba presiza nian
“Moris hanesan negosiante labele baruk no moe atu halo servisu saida de’it tuir forsa ida-idak nian nune’e labele tane liman ba ema seluk no estadu, tenke esforsu-aan hodi kria netik negósiu ki’ik ruma nune’e bele hetan osan hodi sustenta ba nesesidade familia nian no haree alin sira nia estudu.” Dehan Jacinta Monis Pereira
Nia hatutan kria atividade negósiu ki’ik durante tinan ida nia laran mai ho osan rasik la impresta ema seluk nian hodi halo negósiu tanba hakarak halo negósiu oan ruma tenke prepara osan nune’e to’o ikus la iha failansu ruma.
“Atividade negósiu ne’ebé loron-loron ha’u halo to’o agora hanesan fa’an sigaru LA, Suria, Malboro mutin no mean, Esse, Joker, Bee agua ki’ik no boot inklu gazolina. Ha’u gosta fa’an sasan iha fatin ida ne’e tanba hanesan terminal no akumula ema husi Munisipiu tolu hanesan Ermera, Likisa no Bobonaro ne’ebé sasan hirak ne’e fasil tebes ba ema hola lalais. Bainhira ita la fa’an sasan sira hanesan ne’e susar tebes ema hola no ita-nia negosiu mós mohu ba beibeik.” Dehan nia
Nia afirma sigaru LA no Malboro ne’ebé hola iha loja xineza ho folin sigaru LA masu ida ho nia presu $2.00 Malboro masu ida $2.50, sigaru Esse masu ida $4.00, Joker plastik ida $7.50, Bee agua ki’ik ida $0,25 no agua boot $0,50 inklui gazolina iha agua boot ida 2,00 dolar, ne’ebé kada loron sempre hetan osan too 15 too 20 dolar liu
Esplika kle’an liutan katak Jacinta kria negosiu ki’ik ida ne’e durante tinan ida nia laran ona iha trotoar leten maske iha atividade fa’an sasan hirak ne’e hasoru problema oioin maibé nafatin esforsu-aan alkansa mehi ida ne’e tanba liuhusi negosiu ida ne’e hodi ajuda ona nesesidade oioin inklui suporta alin sira ba estudu.
Reportajen : Nelfiano
Foto : Nelfiano