Dili, 13 Janeiru 2025 (Média Democracia) – António da Costa ho idade 64 husi Munisipiu Likisa Postu-Administrativu Bazartete daudaun ne’e hela iha tasi Tolu hodi kria negosiu ki’ik iha dalan ninin hodi responde ba nesesidade familia nian
Tuir Antonia da Costa hateten, durante tinan barak nia laran moris hanesan negosiante labele moe atu fa’an sasan iha dalan ninin, nune’e bele hetan osan ituan hodi suporta ekonomia familia uma laran tanba liuhusi negósiu ida ne’e bele fasilita mós bei-oan sira ba iha nivel edukasaun.
“Modo-tahan ne’ebé ha’u lori halo negósiu hanesan ai-farina tahan, lakeru dikin, bayan repollu, koto, liis mutin no mean aidila-okir no seluk tan, bainhira ema lori mai husi Munisipiu Likisa entaun ha’u sempre hola hamutuk $20 dolar. Hafoin kesi fahe fila fali mostrada futun ida $0,50, liis plastik ida $0,50, afarina-tahan futun ida $0,25 no repollu fuan ida $0,50. Modo tahan hirak ne’e mak loron-loron ha’u nia negósiu hanesan mós ha’u nia toos.” Dehan António da Costa
Nia hatutan osan ne’ebé durante uza lori halo negósiu ki’ik ne’e uza osan simu husi idozu nian, nune’e deside kria negosiu ki’ik hanesan fa’an modo iha dalan ninin, nune’e bele hetan osan hodi responde ba presiza nian
“Maske sasan ne’ebé folin ho rendimentu ne’ebé ki’ik kada loron modo sempre folin $ 3.00 to’o 8.00 dolar maibé sei bazeia mós ba komprador sira tanba ema barak moris halo negosiu iha dalan ninin. Maibé esforsu hirak ne’e liuhusi ita ida-idak nia-aan rasik hodi buka meius oioin oinsá ita-nia modo bele folin hodi hetan fila-fali osan funan ituan hodi hola nafatin modo husi ema seluk hafoin fa’an hikas nune’e ita-nia negósiu labele lakon bainhira ita sei iha forsa.” Dehan nia
Nia salienta kada loron sempre hetan osan ho rendimentu ne’ebé naton hanesan 5.00 dolar ba leten maibé haree mós ba situasaun no kondisaun hanesan tempu udan la fa’an no modo sempre dodok dalaruma Gurada Munisipiu Dili mai halo revista sempre duni hela de’it, entaun sasan labele folin to’o $10.00 dolar maibé esforsu nafatin aan maske iha atividade negósiu ne’e hetan dezafiu oioin
Esplika kle’an liután katak maske António ho idade ne’ebé boot maibé ida ne’e la sai bareira ba nia atu halo negósiu iha dalan ninin, nune’e bele hetan osan hodi sustenta ba nesesidade familia nian no haruka bei-oan sira ba estudu, tanba atividade ne’e hotu sempre akompaña husi espiritu maromak nian.
Reportajen : Nelfiano
Foto : Nelfiano