Dili, 17 Janeiru 2025 (Média Democracia) – Casilda de Fatima ho idade 73 husi Munisípiu Bobonaru Postu-Administrativu Maliana, daudaun ne’e hela Munisipiu Dili Postu-Administrativu Dom Alexo suku Comoro Aldea Moris Foun kampu-baru, loron-loron halo atividade negósiu ki’ik hodi sustenta ba nesesidade
Tuir Casilda de Fatima hateten, durante moris iha mundu ida ne’e hanesan ema negósiante halo atividade loron-loron hanesan fa’an iha dalan ninin tanba hakarak atu sustenta nesesisidade nia presiza no suporta oan sira ba iha nivel estudu
“Ha’u maske idade boot ona maibé ha’u nafatin halo servisu tuir kbiit ne’ebé iha tanba loron-loron ita tur de’it iha uma osan sei la mosu ne’ebé buat hotu ita tenke esforsu aan. Fa’an sasan sira estrada ninin maske hetan difikuldade oioin dalaruma Guarda Minisípiu Dili sempre mai duni hela de’it no hadau ami nia sasan maibé ha’u nafatin fa’an nune’e bele hetan osan ituan hodi fasilita ba ha’u nia presiza.” Dehan Casilda de Fatima
Nia hatutan sasan ne’ebé loron-loron lori halo atividade negósiu ki’ik iha trotoar leten hanesan fa’an fehuk midar, haas, talas, aimanas, lakeru mutin no sasan sira seluk tanba sasan sira ne’e fasil atu folin lalais no la estragu sedu
“Sasan ne’ebé durante ne’e ha’u lori halo negósiu ki’ik hanesan fa’an fehuk midar, haas, talas, aimanas, lakeru mutin no sasan sira seluk. Sasan ne’ebé lori halo negósiu uza ha’u nia osan rasik la impresta husi ema seluk. Bainhira ita impresta osan husi ema seluk kada fulan la setor entaun ida ne’e bele problema mai ha’u nia moris tanba laiha forsa atu seluk ema nia osan.” Dehan nia
Nia salienta osan ne’ebé kada loron hetan ho rendimentu ne’ebé ki’ik tebes maibé ida ne’e la sai problema mai atividade negósiu tanba liuhusi ne’e bele ajuda presiza loron-loron nian
“Osan kada loron ha’u hetan $ 4.00 too $7.00 dolar ba leten maibé sente ida ne’e naton ona atu rejolve ha’u presiza loron-loron nian. Bainhira ita halo negósiu hodi buka osan, se mak atu tau matan mai ita-nia presiza, di’ak liu uza forsa ne’ebé ita iha esforsu nafatin halo negosiu nune’e bele hetan osan ituan hodi responde ba presiza nian.” Nia haktuir
Esplika kle’an liután katak maske negósiante Casilda ho idade ne’ebé boot maibé ida ne’e la sai bareira ba nia atu halo negósiu iha dalan ninin tanba liuhusi esforsu halo negósiu ki’ik durante ne’e hodi sustenta ba nesesidade uma laran nian. Fiar katak atividade ne’ebé ita halo loron-loron sempre nakonu ho domin maromak nian hodi loke nafatin ita-nia hanoin oinsa halo negósiu hodi hetan osan bele sustenta ba presiza.
Reportajen : Nelfiano
Foto : Nelfiano