Dili, 12 Marsu 2025 (Média Democracia) – Sekretariadu Estadu Protesaun Sivil (SEPC) liuhusi Autoridade Protesaun Civil (APC) servisu hamutuk ho Un Women fasilita treinamentu durante loron tolu ba membru Autoridade Protesaun Sivil hamutuk nain 25 ne’ebé reprezenta husi Munisipiu covalima, Ermera, no viqueque. Treinamentu ne’e hala’o iha salaun João Paulo II comoro, Dili
Iha entrevista ho Sekretariadu Estadu Protesaun Sivil Domingos Mariano hateten, fulan tolu ba kotuk protesaun sivil asina ona MoU ho Un Women nia projetu tarjetu ba iha grupu feto sira relasiona ho mudansa klimatiku ne’ebé sempre akontese kada tinan, ne’e hanesan preokupasaun mundial tanba ne’e Un Women hatene katak grupu feto sira sai vulneravel tebes bainhira akontese dezastre
“Ohin ami iha ne’e prepara ona fasilitador sira atu fó treinamentu ba membru APC sira hodi sai treinador liuhusi kapasitasaun funsionariu sira atu bele kontinua desamina infórmasaun kona-ba edukasaun, redusaun risku dezastre ba grupu feto sira iha Munisipiu tolu hanesan Viqueque, Ermera Kovalima, hodi hasae koñesimentu feto sira kauza husi dezastre naturais, oinsa atu prevene no kuidadu bainhira dezastre akontese depois preparasaun feto sira, resposta feto sira, rekoopera feto sira bainhira dezastre akontese atu nune’e feto sira nafatin fórsa hasoru dezastre.” Dehan Sekretariadu Estadu Protesaun Sivil Domingos Mariano
Nia hatutan treinamentu ne’ebé sei hala’o durante loron tolu, no Munisipiu tolu mak sei uluk no la taka dalan ba iha Munisipiu seluk, espera katak treinamentu ne’e hotu sei fó oportunidade ba tan munisipiu seluk ne’ebé seidauk tuir treinamentu refere
Iha sorin seluk reprezentante Un Women iha Timor Leste Nishtha Satyam hatete, objetivu prinsipal husi suporta ne’e halai liubá iha fórmasaun ba iha fórmador sira ba iha partisipante protesaun sivil nian ne’ebé total ruanulu resin-lima (25) mak sei tuir treinamentu ida ne’e durante loron tolu atu nune’e sei sai treinador ne’ebé di’ak no integra asuntu jerenu iha mudansa klimatika nomos risku dezastre, nune’e bele fahe ba iha komunidade sira
“Suporta ne’ebé Un Women fó ne’e la’os osan maibé oinsa atu fasilita teknika ba iha APC de’it liga liubá kapasitasaun membru sira ne’ebé sei tuir fórmasaun durante loron tolu ne’e, haree ba osan espera katak iha tinan oin Un Women sei apoiu osan ba iha Autoridade Protesaun Sivil.” Dehan Reprezentante Un Women iha Timor Leste Nishtha Satyam
Nia hatutan bazeia ba iha MoU ne’ebé asina husi Un Women nomos APC ne’e durasaun servisu hahu husi 2025 to’o 2028 no sei suporta nafatin Governu Timor-Leste liuliu ba iha Autoridade Protesaun Sivil
Reportajen : Domingas
Foto : Domingas