Dili, 10 Juñu 2025 (Média Democracia) – Prezidente Republika Jose Ramos-Horta espresa ninia sentidu kondolénsia no profunda ba Governu no Povu Zámbia ba falesimentu Eis-Prezidente Edgar Chagwa Lungu, iha Pretória, Áfrika-Súl.
Iha karta kondolénsia formál ida ne’ebé diriji ba Prezidente Repúblika Zámbia nian, Sua Exelénsia Hakainde Hichilema, iha loron 06 fulan Juñu tinan 2025, Prezidente Ramos-Horta rekoñese kontribuisaun signifikativu sira husi matebian Eis-Prezidente ba dezenvolvimentu Politiku no Instituisionál Zámbia nian durante nia mandatu nu’udar Xefe Estadu.
Prezidente Ramos-Horta rekoñese Eis-Prezidente Lungu nia dedikasaun ba servisu públiku no nia kompromisu ba prinsípiu sira husi estadu direitu no unidade nasionál, ne’ebé inkorpora iha Zámbia nia lema nasionál “Zámbia Ida, Nasaun Ida. Prezidente observa katak Sr. Lungu servisu ho determinasaun no lideransa durante períodu difísil ida iha Zámbia nia istória.
“Eis-Prezidente Lungu hala’o papél importante ida iha vida polítika no institusionál Zámbia nian, servisu ho dedikasaun, determinasaun, no espíritu lideransa nian durante periodu difísil ida iha istória nasaun nian. Ninia dalan guia husi sentidu dever no kompromisu forte ida ba servisu públiku, estado direitu, no unidade nasionál, prinsípiu sira ne’ebé inkorpora iha ‘Zambia Ida, Nasaun Ida.’ Iha momentu tristeza no lutu ida-ne’e, ami espresa ami nia solidariedade ho Nasaun Zambia ne’ebé triste lakon sira nia Eis-Xefe Estadu ida. Ami hamutuk ho imi hodi hanoin hikas, ho esperansa katak ninia legadu bele inspira jerasaun futuru sira atu servisu ho kompromisu foun ba paz, demokrasia, no dezenvolvimentu.” Dehan Prezidente Ramos-Horta
Prezidente Ramos-Horta nia mensajen refleta ligasaun forte amizade no solidariedade entre Timor-Leste no Zambia, nasaun rua ne’ebé hasoru ona dezafiu signifikativu sira iha sira-nia dalan ba demokrasia no dezenvolvimentu.
Reportajen : Domingas
Foto : Domingas