Dili, 20 Agostu 2025 (Média Democracia) – Sosiedade Sivíl HAK ho Luta hamutuk hato’o parabens ba selebrasaun aniversariu falintil ba Dala 50, no husu atu banati tuir lalaok sira uluk Luta nain sira hala’o ona hodi fó transparansia no garantia ba sidadaun hotu-hotu iha Timor Leste.
Iha entrevista ho Diretór ezekutivu organizasaun Luta hamutuk Jose Alves da Costa hateten, ba dala uluk nian lori Sosiedade Sivíl Luta hamutuk hakarak hato’o sentidu tristeza tanba iha funu naruk ida Luta ba hetan independensia, ne’e funu nain barak mak lakon sira nia vida hodi independensia ba rai ida ne’e.
“Falintil moris ho prinsipiu ida katak, falintil maka luta ba independensia no sira brani Luta hasoru inimigu sira iha tempu ne’ebá ho ain tanan ho isin molik hodi lao lemo-lemo iha ailaran ho sira nia slogan ida katak “biti mak aitahan sumasu maka Ai-abut” iha momentu ida ne’e ha’u hakruk no apresia ba Luta falintil sira nian iha tempu ne’ebá, hafoin tinan ruanulu resin ita hetan independensia nu’udar sidadaun ida no hanesan juventude ida ne’ebé la barak maibé uluk kontribui mós iha Luta falintil nian iha tempu pasadu sente teriste tanba Esperitu Luta nian seidauk to’o rohan no esperensa falintil.” Dehan Diretór Ezekutivu organizasaun Luta hamutuk Jose Alves da Costa ba jornalista sira iha nia kna’ar fatin
Nia hatutan povu maka bee, falintil ikan maibé depois ukun rasik-an ikan sira agora ne’e moris isin di’ak iha rai maran nian leten, signifika katak lolos falintil maka defende povu ne’e nia moris di’ak depois ukun rasik-an hotu-hotu asiste katak povu barak mak sei sofrementu nafatin hanesan uluk luta ba independensia.
“Ita haree katak uluk ne’e falintil maka defende povu ne’e luta ba independensia nian, tanba sa agora ne’e ukun-an tiha la defende povu. Sosiedade Sivíl koalia reprezenta saida mak ita nia sidadaun hasoru tanba ita haree agora ne’e povu barak mak sei sofrementu ba iha dezenvolvimento sira iha ita nia rai rasik.” Hatutan Diretór Ezekutivu organizasaun Luta hamutuk Jose Alves da Costa
Nia reafirma, mensajen ikus husu ba falintil sira no Guerilla sira ne’ebé sei moris, favor ida labele hanoin de’it imi nia-an maibé hanoin imi nia povu, buka imi nia maluk sira ne’ebé ema ida seidauk tau matan, buka povu sira ne’ebé sei terus to’o agora, buka nafatin sira buka hodi resolve problema, halibur sira hanesan uluk imi halibur malu iha ailaran hodi luta ba independensia.
Hatutan husi Diretor Ezekutivu Asosiasaun HAK Feliciano da Costa Araujo katak, lori Asosiasaun HAK hakarak hato’o votus parabens ba aniversariu loron forsa defeza falintil nian ne’ebé sei komemora ba dala 50, hanesan Asosiasaun HAK husu katak espera iha aniversariu ne’e iha transparansia no garantia ba iha rekrutamentu ba iha F.FDTL foun iha tinan oin atu labele mosu sistema oioin.
“Rai ida ne’e sura sidadaun hotu-hotu ne’ebé oferese sira-nia terus, mate balun nia isin ita la hetan to’o agora, hanesan Asosiasaun ne’ebé luta ba direitus umanus fiar katak, iha loron falintil nian ne’e sira hatene ona moto ida ne’ebé deste uluk sempre hatete, “falintil hanesan ikan no povu mak hanesan bee” atu tau moto ne’e halo didi’ak, ha’u hanoin jerasaun sira ne’ebé antigu labele temi ida ba ida to’o ohin loron, atu bele lori nafatin falintil F.FDTL ne’e sai hanesan salva guarda ba estadu ida ne’e nomos salva guarda ba povu Timor-Leste.” Dehan Diretór ezekutivu Asosiasaun HAK Feliciano da Costa Araujo
Nia reafirma dala ida tan ba oportunidadade ida ne’e atu husu ba iha foinsae sira F.FDTL, tau farda ne’e uza ema nia ruin no ran mak sosa tanba ne’e lori asosiasaun HAK nia naran hakarak husu ba iha parte kompetente atu tau matan ba iha membru sira atu bele uza farad tenke konsiente iha fatin ida ne’ebé serve atu uza farda laos naran-naran de’it, pior liu lori farda ba tama iha diskoteka, favor atu rai-an, tanba hanoin katak luta nain sira uluk ne’ebé hatais farda sira mai ho atitude ne’ebé di’ak, tanba ne’e husu ba F.FDTL tenke hatudu atitude di’ak hanesan luta nain sira iha tempu uluk.
Reportajen : Domingas
Foto : Domingas