Dili, 01 Setembru 2025 (Média Democracia)- Plan Internasional iha Timor-Leste, realiza Dialogu kolaborasaun multi-sektoral entre govenu no organizasaun sosiedade sivil, hodi diskute kona-ba asuntu direitu no protesaun labarik iha Timor-Leste no implementasaun iha baze, dialogu ne’e hala’o iha salaun Tawer Kofe Fatuhada, Sesta semana kotuk.
Diretora Program Manejer ba Programa iha PLAN, Eta Mota hateten, objektivu husi dialogu ne’e hanesan sektoral no multi-sektoral atu bele servisu hamutuk hodi atinji objektivu ne’ebé hakarak alkansa iha futuru.
“Ita koko servisu hamutuk hodi haree karik iha parte Sosiedade Sivil nian servisu ketak, governu servisu ketak, ita sei la atinji objektivu. Liuhusi dialogu ne’e koko atu haree oinsa bele servisu hamutuk. Ho objektivu loloos husi projeitu ne’e ita hakarak labarik sira bele komprende kona-ba sira-nia direitu no reklama sira-nia direitu, maibé ita mós hakarak Sosiedade Sivil no Governu bele servisu hamutuk hodi haforsa liña koordenasaun bele fó protesaun ba labarik hotu-hotu.” Dehan Diretora Program Manejer, Eta Mota
Diretora Manejer Eta Mota hatutan, esklarese atividade ne’e hetan apoiu fundus husi Uniaun Europeia durasaun ba projetu tinan tolu, Plan la servisu mesak maibé hamutuk ho ONG hodi implementa projeitu iha Munisípiu haat.
“Ami la implementa mesak programa ne’e maibé ami mós iha parseiru hanesan Mane iha Vizaun Foun, Parseiru Lokal nomos ONG ba Futuru, organizasaun tolu servisu hamutuk, lidera husi Plan Internasional, ami fó oportunidade ba organizasaun Sosiedade Sivil iha parte terseiru nian ne’ebé ho fundus ki’ik ituan bele implementa durante tinan ida-nia laran. Daudaun implementa programa iha Munisípiu haat (4), hanesan Dili, Manufahi, Ermera no Baucau, Plan mak kontrola iha Dili no Manufahi, Parseiru ba Futuru kontrola iha Ermera, Parseiru Mane Ho Vizaun Foun kontrola iha Baucau.” Hatutan Diretora Programa Manejer Plan International
Iha fatin hanesan Program Manager Embaixada Uniaun Europeia, Seth Van Doorn hateten, fó apresiasaun ba parseiru sira hotu nune’e Uniaun Europeia nafatin iha komitmentu apoiu atu bele luta ba liberdade no asegura labarik feto no feto sira-nia futuru iha nasaun Timor-Leste.
“Ha’u haree oinsá ho tinan lima husi agora luta ba liberdade, luta ba esperansa. Ha’u hanoin katak buat hotu ne’ebé halo ona atu asegura futuru nasaun ida-ne’e nian no futuru nasaun ne’e nian mak labarik sira iha Timor-Leste.” Dehan Program Manager Embaixada Uniaun Europeia, Seth Van Doorn
Embaixador Uniaun Europeia hatutan, klaru katak ne’e mak tópiku ida-ne’ebé importante liu, ita hotu hatene katak metade husi foin-sa’e sira moris iha pobreza multi-dimensional. Liuhusi servisu hamutuk ho urjensia kria ambiente ida-ne’ebé di’ak ba labarik ida-idak nian nune’e bele sai boot no livre husi violénsia oioin.
Esplika liután iha diologu ne’e partisiapasaun maximu husi parseiriu sira hanesan INDICA, Fokuper, S.E.I, Xefe Departamentu Adolozensia ba Futuru, Asosiasaun Juventude Hakbit Justisa Timor-Leste, representante Ministeriu MSSI, Fundasaun Ahisaun, Asosiasaun Legal ba Feto no Labarik, Xefe Departamentu Saude Adolozensia.
Reportajen : Nelfiano
Foto : Nelfiano