Dili, 02 Setembru 2025 (Média Democracia) – Lideransa no feto potensiál realiza komunikadu imprénsa hodi avalia iha partidu ida-idak no líder ne’ebé iha podér la hatudu kualidade lideransa ideal ne’ebé aprende durante sesaun formasaun. Maibé importante atu integra valór kona-ba integridade, onestidade, umilidade no empatia ba povu nu’udar elementu esensiál hodi transforma sosiedade ida prosperu no Estadu ida estável iha future. Komunikadu ne’e Media Democracia asesu husi Pajina JSMP, Tersa semana ne’e.
Diretora Ezekutiva JSMP, Ana Paula Marçal hateten, avalisaun ne’e hato’o husi partisipante sira durante sesaun formasaun ho tópiku “lideransa transformativu no demokrasia” ne’ebé realiza iha 28 Agostu 2025, iha Salaun ONG Prospek, Munisípiu Lautein.
“JSMP fiar katak partisipasaun ativu feto iha nível oioin iha prosesu dezenvolvimentu nasionál ne’e importante tebes. Tanba ne’e, JSMP komprometidu atu kontinua promove no habelar tan atividade formasaun ba kuadru feto potensiál, inklui kuadru partidu polítika sira hodi bele hasa’e koñesimentu no kualidade lideransa iha nivel no setór oioin hodi bele kontribui efetivamente ba dezenvolvimentu nasionál.” Dehan Diretóra Ezekutiva JSMP Ana Paula Marçal
Diretora hatutan, formasaun ne’e ho objetivu ida atu kontribui ba hasa’e nível koñesimentu no kapasidade feto potensiál sira kona-ba lideransa transformativa no demokrasia. Rua atu asegura partisipasaun ativu feto iha nível hotu-hotu no reprezentasauan ida ho kualidade. Tolu atu asegura bainhira iha oportunidade asume kargu públiku sira bele ezerse kna’ar ho profesionál, integridade nomos koñesimentu adekuadu hodi kontribui di’ak liuba sosiedade.
“Matéria formasaun ne’e foku ba lideransa tranformativa ne’ebé diskute kestaun relevante kona-ba konseitu lideransa transformativu ne’ebé introdús konseitu lideransa iha jerál, lideransa tuir péritu nia hanoin/hanorin, diferensa entre líder, jestór, xefe no patraun ka boos, tipu lideransa, kualidade lideransa ne’ebé intregra valór kona-ba integridade, onestidade, responsabilidade (akontabilidade), anti-korrupsaun ne’ebé nu’udar elementu xave iha konseitu lideransa iha era atuál.” Hatutan Diretora Ezekutiva JSMP
Diretora Ezekutiva JSMP afirma matéria kona-ba formasaun nian ne’e hotu elabora iha manuál ne’ebé distribui ba partisipante sira no finansia husi fundu ba sosiedade sivil ne’ebé jere husi Gabinete de Apoio à Sociedade Civil (GASC).
“Durante sesaun husu no hatan partisipante hotu manifesta sira-nia laran haksolok tanba bele iha espasu no oportunidade hodi aprende kona-ba kestaun lideransa ho ninia konseitu no elementu xave sira ne’ebé líder sira ‘merese’ atu hetan hodi bele dezempeña-an ho di’ak, atu ajusta no korresponde ho komplesidade no dezafiu mundu atuál.” Afirma Diretora Ezekutiva
Diretora informa, formasaun ne’e relevante tebes ba kna’ar atuál no ba futuru, partisipante rekomenda ba JSMP atu organiza formasaun hanesan ne’e regularmente iha future, tanba plataforma permite sira reatualiza no aprofunda koñesimentu,
“Iha parte seluk promove diálogu no komunikasan produtivu entre grupu no organizasaun partidaria feto sira no organizasaun sosiedade sivil hodi aprende hamutuk, partilla esperiénsia no perspetiva, preokupasaun no halo jestaun ba dezafiu sira iha sira ida-idak nia organizasaun.” Informa Diretóra Ezekutiva JSMP Ana Paula Marçal
Nia salient, Lideransa no feto potensiál sira iha Munisípiu Lautem husu mòs ba Deputadu sira iha Parlamentu Nasionál (PN) atu bele hamenus regalia sira no konsentra rekursu finanseriu adekuada ba feto sira iha área rurál hodi hakbiit ekonomia família iha baze. Sira mós husu ba Deputadu/a no membru governu sira atu limita no hamenus viajen desnesesáriu ho delegasaun boot ba estranjeiru atu bele kanaliza rekursu Estadu nian sirkula iha rai laran, liuliu iha komunidade.
Esplika liutan, totál partisipante hamutuk 17 husi planu inisiál atu absorve partisipante 20, ne’ebé mai husi partidu polítiku sira iha asentu parlamentár no organizasaun sosidade sivil. Partisipante sira husi CNRT nain (5), Fretilin (5), PD (4) nomos reprezentante organizasaun sosiedade sivil (3). Enkuantu PLP no KHUNTO iha inísiu halo aprosimasaun no koordenasaun konfirma atu delega sira nia membru maibé iha loron realizasaun sira la konsege partisipa.
Reportajen : Nelfiano
Foto : Média JSMP