Dili, 17 Setembru 2025 (Média Democracia) – Komandu Polisia Nasional Timor-Leste (PNTL) realiza komunikadu imprénsa hodi atualiza situasaun seguransa durante loron-rua kona-ba Estudante Universitáriu Timor-Leste halo manifestasaun kontra Orgaun Soberanu iha Parlamentu Nasional. Konferensia ne’e hala’o iha Kuartel Jeral Caicoli Dili.
Porta-vos, Komandu Polisia Nasional Timor-Leste (PNTL) Superintendente Polisia João Belo dos Reis, atualiza situasaun seguransa durante loron-rua kona-ba Estudante Univertisariu Timor-Leste (EUTL), halo manifestasaun hasoru Orgaun Soberanu iha Parlamentu Nasional.
“Tuir dadus ne’ebé Autoridade Seguransa PNTL rejista kazu insidente durante loron rua Estudante Univertisariu Timor-Leste (EUTL), halo manifestasaun hasoru Orgaun Soberanu Parlamentu Nasional lao di’ak, maibé mosu anarkismu balun hodi rejulta kareta, motor ho postu Polisia ida hetan estragus no Pesoal Polisia ho Manifestante balun hetan kanek.” Dehan porta-vóz Komandu Polisia Nasional Timor-Leste Superintendente Polisia João Belo dos Reis
Superintendente Polísia hatutan, dadus ne’e dadaun PNTL rejista iha manifestasaun loron rua ne’ebé Organiza husi Estudante Univertisariu Timor-Leste (EUTL), mosu anarkismu hodi rejulta kareta-4 motor-2 no Postu Polisia Transitu ida, hetan estragus no Pesoal Polisia Nain-2 ho Manifestante nain-2 hetan kanek.
Esplika liután ho situasaun ne’e ohin tama ona ba loron tolu, EUTL kontinua halo manifestasaun hasoru Orgaun Soberanu Parlamentu Nasional, tanba ne’e komandu PNTL husu ba manifestante husi estudante no Sosiadade Sivil sira hotu disiplina nafatin hatudu hahalok hanesan estudante akademika.
Reportajen : Nelfiano
Foto : Media PNTL