Dili, 30 Janeiru 2026 (Média Democracia) – Marquita de Graca ho idade (52) husi Munisípiu Baucau daudaun ne’e hela iha Munisípiu Dili Postu-Administrativu Dom-Aleixu Suku Bebonuk, moris hanesan negosiante loron-loron sempre halo atividade negosiu ki’ik iha dalan ninin hodi responde ba nesesidade familia nian.
Negosiante Marquita de Graça hateten, durante tinan barak nia laran moris hanesan ema negosiante hodi halo atividade negosiu ki’ik, nune’e bele hetan osan ituan hodi sustenta ba nesesidade loron-loron nian nomos haruka oan sira ba iha nivel edukasaun.
“Ha’u hanesan ema negosiante, loron-loron tenke ba hola modo husi merkadu Taibesi, nune’e bele lori mai fa’an fali. Modo ne’ebé kada loron ha’u ba kompras iha merkadu Taibesi sempre lori osan $10 lae $20 dolar. Nune’e hodi hola modo tahan hanesan mostarda mutin no metan, fore nurak, tomate liis no fehuk dikin, aidila nurak no seluk tan, ha’u nia hanoin modo ne’ebé ha’u hola lori ba fa’an tuhan di’ak tebes, tanba bele hetan fali osan ituan hodi sustenta familia.” Dehan Negosiante Marquita de Graça
Nia hatutan, modo ne’ebé kada loron ema hola to’o $20 lae $30 dolar maibé haree situasaun klima hanesan tempu udan, entaun modo folin la hotu, modo tahan balun bele dodok, tanba rai liu loron rua to’o tolu ba leten modo sai dodok no estraga de’it, entaun modo folin dalaruma la to’o $20 dolar.
“Ha’u nafatin halo negosiu ki’ik iha trotoar leten maske hasoru dezafiu oioin hanesan iha tempu udan no anin boot, ha’u labele ba fa’an iha trotoar leten, tanba kondisaun udan. Durante ne’e ami fa’an modo uza de’it payung mak lori halo mahon, maibé agora anin boot hanesan ne’e la uza payung lori de’it lona mak taka, entaun halo modo tahan tasak lalais de’it ema labele hola no estraga de’it.” Hatutan Marquita de Graça
Nia salienta, maske hetan dezafiu oin-oin maibé nafatin esforsu-aan hodi halo negosiu ki’ik, nune’e bele hetan osan ituan hodi haree oan sira-nia eskola no fasilita mós ba iha nesesidade uma laran nian.
“Ha’u iha oan na’in tolu, mane ida no feto rua, daudaun ne’e oan mane iha kaben ona no oan feto sei hala’o hela prosesu estudu iha sekundariu no univesidade nian, ne’ebé daudaun ne’e ha’u tenke buka osan liuhusi dalan oioin bele hetan osan, hodi haree ba ami nia presiza, tanba ha’u nia kaben agora idade boot ona laiha forsa atu halo servisu todan, hodi buka osan bele responde ba familia nia presiza.” Salienta Marquita de Graça
Nia afirma, liuhusi kria negósiu ki’ik ida ne’e bele responde ba presiza loron-loron nian nomos haree oan sira nia eskola bainhira tur de’it iha uma sei la hetan osan, nune’e tenke esforsu-an buka osan liuhusi atividades oioin.
Esplika liután katak, Marquita sai hanesan xefe familia, tanba nia kaben ho idade boot ona ne’ebé laiha forsa atu halo servisu hodi buka osan, maibé liuhusi kria negosiu ki’ik ida ne’e bele hetan osan hodi sustenta ba nesesidade loron-loron nian inklui hodi apoiu mós oan ba prosesu estudu.
Reportajen : Nelfiano
Foto : Nelfiano