Dili, 29 Maiu 2026 (Media Democracia)- Diretór Diresaun Servisu Investigasaun Kriminál, Superintendente Xefe Polísia João Belo dos Reis informa, Kazu omesidu ne’ebé akontese iha Bidau halaeu tuku 02:00 Otl madrugada, deskonfia hadau malu rai hodi rezulta Sidadaun ida ho naran inisiál Constâncio Saldanha Bere ho idade tinan 19 lakon vida.
“atu hato’o dei’it informasaun balun relasiona ho kazu ida oho malu iha parte Bidau nian, Ohin dadersan tuku rua Madrugada, ekipa Forensik hetan kontaktu husi Populasaun sira iha área ne’ebá, katak akontese kazu oho malu deskofia tanba rai.” Dehan Porta Voz Superintendente Xefe Polísia João Belo dos Reis ba jornalista sira iha Kuartel Jerál PNTL Caicoli Sexta ne’e.
Nia esplika, hafoin simu kontaktu husi komunidade sira iha fatin ne’ebá ekipa desloka kedas ba fatin akontesimentu.
“Nune’e ekipa desloka kedas ba iha fatin ne’eba hetan sidadaun ida ho idade C.S.B. mate iha fatin ho idade tinan 19, Mate isin evakua ona mortuário hodi hein prosesu Autópsia”. Nia afirma
Nia dehan dadaun ne’e Polísia Nasionál Timor-Leste (PNTL), esforsu hodi buka tuir Suspeitu ne’ebé hakotu Constâncio Saldanha Bere nia vida.
“Suspeitu agora ita sei buka tuir, espera ita bele kaptura iha tempu badak, ih ona informsaun, ekipa forensik hamutuk ho doutor sira iha hospital Nasional Guido Valadares hein hela Mandadu autopsia ba prosesu autopsia nian”. Dehan Nia
João Belo haktuir nia hetan informasaun katak iha akontesimentu ne’e vítima hetan taa husi suspeitu iha parte ulun.
“Iha vítima nia ulun hetan taa, no ha’u foin hetan informasaun iha tuku 09:00 Otl dader karik dadus kompletu ona ha’u sei update ba ita boot sira, ha’u labele hateten sai uluk saida mak akontese iha ne’ebá tanba prosesu identifikasaun la’o hela.” Belo adianta
Nia hatutan, agora dadaun suspeitu halo tracking no espera, bele kaptura iha tempu badak, enkuantu kazu ne’e rasik rejistu ona ho Númeru Uniku Krime (NUK):0164/26.DIBCR.
Superintendente Xefe Polísia ne’e dehan dadaun ne’e parte Forensik hamutuk ho doutór sira iha HNGV hein hela mandadu autopsia husi Tribunál hodi prosesu ba autopsia no mate isin ne’e sei asegura hela iha Mortuario hodi submete ba prosesu autopsia hodi hatene kauza mate no maneira mate.
Entretantu kazu ne’e rezulta vítima Constâncio Saldanha Bere lakon vida no kazu omesidu ne’e akontese iha área Bidau Kuluhun, Aldeia Toko Baru 2, Suku Kuluhun, Postu Administrativu Cristo Rei, Munisípiu Díli.
Reportajen : Estefania Cardoso
Foto : Estefania Cardoso