Dili 30 Maiu 2026 (Media Democracia) -Movimentu Foin-sa’e Atsabe (MOFA), realiza konferénsia imprensa kona-ba preokupasaun boot ba públiku relasiona ho kondisaun infraestrutura estrada iha Munisípiu Ermera. MOFA husu ba Governu no entidade relevante atu tau prioridade ba rekuperasaun no hadi’a estrada sira ne’ebé estraga ona no afeta diretamente movimentu ekonomia no asesu komunidade nian.
Tuir Porta-voz Movimentu Foin-sa’e Atsabe (MOFA), Agustino Gomes Fernandes Hateten Estrada ne’ebe sai movimentasaun povu nia agora sai obstakulu bo’ot ba dezenvolvimentu no bem estar komunidade nian.
” Estrada ne’ebé lolós sai dalan hodi fasilita movimentasaun povu, agora sai obstakulu boot ba dezenvolvimentu no bem-estar komunidade nian. Realidade no preokupasaun hosi komunidade-sira ne’ebé uza transporte públiku diariamente, antes tinan-ida ba kotuk, viajen hosi Díli ba Atsabe ka husi Atsabe mai Díli normalmente presiza de’it oras 5 to’o 6. Maibé, tanba estrada ne’ebé aat ba bebeik no difikulta transporte, agora povu tenke presiza oras 12 to’o 14 antes to’o ba sira-nia destinasaun. Situasaun ida-ne’e la merese ba povu, tanba povu lakon tempu produtivu, enfrenta risku boot durante viajen naruk ne’ebé tenke hala’o iha kondisaun estrada ne’ebé aat”. Hateten Porta-voz MOFA Iha Jardim 5 de Maiu (29/05/2026).
Nia afirma tanba preokupasaun estrada aat no tarifa transposte mos sa’e ba bei-beik no nia kustu husi $5 Dolares Sae ba to’o $17 Dolares.
“Preokupasaun ne’e sai grave liu tanba kustu transporte mos auménta aas ba bebeik. Antes, komunidade sira selu de’it US$5 ida-idak atu viazen ba Atsabe. Agora, tanba kondisaun estrada ne’ebé aat no kustu operasionál ne’ebé auménta ba transporte-sira, tarifa transporte sa’e to’o US$17. Ida-ne’e signifika katak povu tenke selu liu dala tolu hosi kustu ne’ebé antes sira selu. Ba família agrikultór sira no komunidade ne’ebé moris ho rendimentu limitadu, aumentu kustu transporte ida-ne’e sai karga ekonómika ne’ebé todan tebes.”nia afirma
Nia hatutan tan realidade seluk ne’ebé pior liu hotu, mak bainhira transporte públiku hapara movimentasaun, tanba estrada aat.
Iha sorin seluk reprezentante povu Ermera, Maudasi hateten karik governu seida’uk iha responde ba preokupasaun refere sira se’i la vota tan.
“Karik seida’uk iha responde husi governu ami se’i la halo tan demostrasaun maibe ami nu’udar Juventede Movimentu Foin-sa’e Atsabe se’i fila fali ba Munisipiu no Postu no fó hanoin ba ami nia komunidade sira katak partidu ne’ebe mak agora lidera no ukun governu ida ne’e sei fila fali mai bosok, tanba ne’e ami se’i halo formasaun ba ami nia komunidade sira atu bele konsiénsia no tau atensaun bainhira atu hili fali partidu ne’ebe mak se’i ukun fali”Dehan Representante Povu Ermera , Maudasi
MOFA husu ba Governu no entidade relevante atu tau prioridade ba rehabilitasaun infraestrutura ne’e tanba afeta asesu komunidade nian, ekonomia lokál, no movimentu ba servisu báziku sira. Problema ida-ne’e la’os de’it afeta ba movimentasaun povu, maibé, afeta diretamente ba atividade ekonómika, edukasaun, saúde no moris loron-loron komunidade nian.
Reportajen : Novita
Foto : Novita