Dili, 19 Juñu 2026 (Media Democracia)– Fundasaun Alola selebra loron aniversáriu ba dala 25, hodi reafirma ba kompromisu atu kontinua promove saúde, edukasaun, empoderamentu ekonómiku no protesaun direitus feto no labarik sira iha Timor-Leste.
Fundadora Fundasaun Alola, Kirsty Sword Gusmão hateten, durante tinan 25 nia jornada, kontribui boot ba mudansa sosial no dezenvolvimentu komunidade sira liu husi programa saúde, edukasaun no advokasia.
“komemorasaun tinan 25 ne’e, Fundasaun Alola nia objetivu atu kontinua servisu hamutuk ho parseiru sira hodi hadi’a moris komunidade no kontribui ba dezenvolvimentu sustentável iha Timor-Leste, Fundasaun Alola hahú nia servisu ho fokus boot ba promosaun susu inan eskluzivu, ne’ebé konsideradu importante tebes ba saúde inan no bebé.” Dehan Fundadora Kristy ba jornalista sira iha Salaun Delta Nova Dili, Sesta ne’e (19/06)
Programa ne’e hahú iha tinan 2002-2003 no depois sai parte importante husi estratéjia fundasaun nian atu hadi’a nutrisuan no saúde labarik sira iha Timor-Leste, aleinde ne’e, dezenvolve mós programa hanesan biblioteka móvel ba área rurál, formasaun komunidade, no inisiativa atu promove independénsia ekonómika ba feto.
Nia dehan, detesaun lalais importante tebes, bainhira moras hetan deteta sedu, oportunidade atu hetan tratamentu no rekupera saúde aas liu, Iha área saúde fundasaun kontinua fó atensaun ba prevensaun no deteksaun lalais moras grave sira, nune’e hakarak apelu ba komunidade atu la ignora sintoma sira no buka asisténsia médika lalais husi klínika ka ospitál sira.
Iha fatin hanesan Diretora ezekutiva Fundasaun Alola, Maria Guteres haktuir, palestra ne’e reforsa importánsia edukasaun saúde no partisipasaun ativu husi komunidade atu hasa’e kualidade moris no saúde públika iha Timor-Leste.
“Inisiativa sira hanesan ne’e importante atu hasa’e konxiénsia públika kona-ba prevensaun moras no promove estilu moris saudável, hanesan oradór mos aprezenta rezultadu peskiza ne’ebé hatudu progresu pozitivu iha área saúde maternu no infantil, dadus sira ne’e revela katak taxa eskluzivu aumenta husi 30,7% ba 44%, rezultadu ida ne’e konsidera nu’udar impaktu husi programa edukasaun no sensibilizasaun saúde ne’ebé implementa iha komunidade durante períodu balun.” Nia adianta
Edukasaun saúde tenke hahú hosi família no kontinua iha sistema edukasaun formal, investimentu iha edukasaun saúde sei ajuda komunidade sira desenvolve hábitus saudável no aumenta kapasidade atu prevene moras sira ne’ebé bele evita, nune’e edukasaun no konxiénsia saúde iha papel importante tebes atu hasa’e bem-estar komunidade no hamenus presaun ba sistema saúde públika.
Sorin seluk Sekretariá estadu igualidade (SEI) Elvina Sousa Carvalho hato’o apresiasaun ba Fundasaun Alola tanba durante tinan barak organizaasaun ne’e kontinua apoia komunidade liuhusi programa bolsa estudu, apoiu ba edukasaun, promosaun saúde no atividade sira ne’ebé fó oportunidade ba ema atu dezenvolve nia kapasidade.
“Fundasaun Alola konsideradu hanesan organizasaun transformadora ida ne’ebé fó kontribuisaun importante ba mudansa sosial no hadi’a moris komunidade sira, hanesan oportunidade importante atu kontinua promove bem-estar no direitu komunidade sira, apresia impaktu pozitivu ne’ebé Fundasaun Alola halo ona ba sosiedade Timor-oan.” Dehan Elvina Sousa
Nia afirma, prevensaun mak xave atu hamenus kazu violénsia no kria ambiente ne’ebé seguru ba ema hotu, importante tebes atu kontinua fó edukasaun no haburas konxiénsia komunidade kona-ba violénsia bazeia ba jéneru ho koñesimentu no atitude pozitivu, bele kria sosiedade ida ne’ebé livre husi violénsia.
Governu sei kontinua servisu hamutuk atu implementa estratéjia prevensaun violénsia bazeia ba jéneru liuhusi envolvimentu autoridade lokál, família, lideransa komunidade no instituisaun relevante sira.
Rreportajen: Leozalia / Juliana
Foto: Juliana