DÍLI, 07 Agostu 2026 (Media Demokrasia) – Governu Timor-Leste reafirma nia kompromisu atu proteje no promove susu been inan hanesan investimentu importante ba jerasaun saudável no futuru nasaun, liuhusi Fórum Nasionál ba Susu Been ne’ebé hala’o ho tema “Susu Been Inan, Investimentu Di’ak ba Jerasaun Saudável.” Governu haktuir katak susu been inan mak fonte nutrisaun kompletu no naturál ba bebé, ne’ebé iha papel importante atu hamenus malnutrisaun, mortalidade infantil, no hadi’a saúde inan no labarik sira iha rai-laran.
Ministra Saúde, Elia dos Reis Amaral, hatete katak tema nasionál tinan ida ne’e, “Susu Been Inan: Investimentu Di’ak ba Jerasaun Saudável”, hatudu katak saúde inan no bebé mak sai baze importante ba dezenvolvimentu futuru Timor-Leste. Tema ida ne’e hato’o mensajen ba komunidade katak investimentu ne’ebé boot liu ba nasaun hahú husi kuidadu inan no bebé iha tempu dahuluk moris nian.
“Governu adota tema nasionál tinan ida ne’e, ‘Susu Been Inan: Investimentu Di’ak ba Jerasaun Saudável’. Tema ida ne’e fó mensajen importante ba ita hotu katak investimentu ne’ebé di’ak ba futuru Timor-Leste hahú husi kuidadu inan no bebé iha tempu dahuluk moris nian. Bainhira ita proteje no promove susu-been inan, ita la’ós de’it salva moris, maibé prepara mós jerasaun ida ne’ebé forte, matenek no produtivu. Susu-been inan mak nutrisaun kompletu, seguru no naturál ba bebé. Susu-been protege bebé hasoru infeksaun, hamenus risku malnutrisaun, ajuda dezenvolvimentu serebru no kresimentu isin, no hamenus mortalidade infantil. Ba inan rasik, susu-been ajuda rekopera depois partu, hamenus risku hemorajia no proteje hasoru moras balun hanesan kankru susun no kankru ovariu,” dehan Ministra Saúde ba jornalista sira iha Novo Turismo, sesta-feira (07/08/2026).
Ministra Saúde subliña katak promosaun susu-been inan presiza apoiu husi parte hotu-hotu, tanba ida ne’e la’ós responsabilidade setór saúde de’it, maibé responsabilidade nasionál.
“Ministériu Saúde kontinua promove kuidadu integradu ba inan no labarik iha loron 1.000 dahuluk moris nian, liuhusi servisu saúde maternal no neonatal, nutrisaun, imunizasaun, monitorizasaun kresimentu, edukasaun saúde no promosaun susu-been inan. Promove susu-been inan la’ós responsabilidade setór saúde de’it, maibé responsabilidade nasaun tomak. Governu Timor-Leste reafirma nia kompromisu atu proteje, promove no apoia susu-been inan, ne’ebé mós hatudu liuhusi implementasaun programa Hospital Hadomi Kosok,” nia hateten.
Iha oportunidade ne’ebé hanesan, Ministra Saúde fó apelu ba inan sira, aman sira no família hotu atu kontinua apoia prática fó susu-been inan, tanba iha benefísiu boot ba saúde, kresimentu no dezenvolvimentu bebé.
“Ha’u hakarak fó mensajen ba inan sira, aman sira no família hotu atu kontinua suporta prática fó susu-been inan. Susu-been eksklusivu durante fulan neen dahuluk no kontinua to’o bebé tinan rua sei fó impaktu pozitivu ba kresimentu no dezenvolvimentu labarik, aumenta produtividade iha futuru no ajuda hamenus mortalidade infantil,” Na hakotu
Reportajen: Joanita / Delfiano (Estajiáriu)
Foto: Joanita