Dili, 07 Setembru 2026 (Media Democracia) – Centro Nacional Chega!I.P asina Memorandum of Understanding (MOU) ho Institute of Business (IOB), ho objetivu atu hametin kooperasaun iha área edukasaun ba dame, direitus umanus, istória no justisa tranzisionál, liuliu liu husi integrasaun Módulu Chega! iha kurríkulu no atividade ensino-aprendizajen. Serimónia asinatura MOU ne’e hala’o iha Sala Auditóriu Arkivu Chega!, Antigu Comarca Balide, Dili, no sei vigora durante tinan tolu.
Dokumentu MOU ne’e asina ofisialmente husi Diretór Ezekutivu Centro Nacional Chega!I.P, Hugo Maria Fernandes, no Reitór IOB, Pedro Miguel de Fátima G. B. Ximenes.
Tuir Diretór Ezekutivu Centro Nacional Chega!I.P, Hugo Maria Fernandes relata katak, Kooperasaun ne’e iha objetivu atu estabelese parseria entre instituisaun rua hodi integra Módulu Chega! iha kurríkulu edukasaun IOB, liuliu iha matéria istória, direitus umanus no justisa tranzisionál.
“Além husi integrasaun Módulu Chega!, kooperasaun ne’e mós sei fó oportunidade ba dosente IOB atu partisipa iha formasaun sira ne’ebé fasilita husi Centro Chega!I.P, no dezenvolve atividade edukativu hanesan semináriu, workshop, palestra, konferénsia no vizita ba sítiu istóriku.”dehan Diretór Ezekutivu Centro Nacional Chega!I.P, Hugo Maria, (07/09/2026).
Nia esplika liutan Parte rua mós konkorda atu estabelese koordenasaun regulár hodi planeia no hala’o atividade extra-kurrikular sira, ne’ebé bele kontribui ba hasa’e kualidade edukasaun no komprensaun estudante sira kona-ba istória, dame, direitus umanus no memória pasadu Timor-Leste.
“Kooperasaun ne’e bazeia ba misaun Centro Chega!I.P atu promove implementasaun rekomendasaun sira husi Relatóriu Finál Comissão de Acolhimento, Verdade e Reconciliação (CAVR) – Chega!, liuliu rekomendasaun kona-ba institusionalizasaun memória no promosaun direitus umanus liu husi edukasaun, formasaun no solidariedade ba sobrevivente sira ne’ebé vulnerável tanba violasaun direitus umanus iha pasadu”.Nia informa
Nia Subliña tan Centro Chega!I.P mós iha mandatu atu promove implementasaun rekomendasaun komún entre CAVR no Comissão da Verdade e Amizade (CVA), inklui reparasaun, memorializasaun no estabelesimentu Sentru Nasionál Memória, Peskiza no Aprendizajen.
“Atividade kooperasaun ne’e hala’o tuir Dekretu-Lei N.º 48/2016, ne’ebé aprova Estatutu Centro Nacional Chega!I.P, liuliu dispozisaun kona-ba kompeténsia no kooperasaun ho entidade sira seluk”.Nia relata
Nia esplika Centro Chega!I.P iha vizaun atu kontribui ba harii sosiedade ida ne’ebé inklusiva, moris iha dame, respeita direitus umanus no la repete injustisa no violasaun sira husi istória pasadu.
Nune’e, instituisaun ne’e kontinua dezenvolve parseria nasionál no internasionál hodi reforsa rede servisu sira no promove implementasaun rekomendasaun relevante husi Relatóriu Finál CAVR – Chega! no Relatóriu Per Memoriam Ad Spem (PMAS) husi Comissão da Verdade e Amizade (CVA).
Reportajen : Tomás dos Santos
Foto : Tomás dos Santos