Díli, 17 Setembru 2026 (Média Democracia) – Tékniku Ajénsia TIC TIMOR, I.P., liuhusi Diresaun Dezenvolvimentu Sistema Teknolojia no Inovasaun (DDSTI), aprezenta Sistema Jestaun Rekursu Umanu ka Human Resource Management System (HRMS) ba Ministériu Justisa (MJ).
Objetivu prinsipál husi aprezentasaun Sistema HRMS ne’e mak atu fó koñesimentu ba Diretór Nasionál sira, Diretór/a sira, kargu xefia no funsionáriu Ministériu Justisa kona-ba sistema ne’e, nune’e bele adapta ho nesesidade MJ no uza sistema refere hodi jere dadus rekursu umanu ho di’ak, lalais no efisiente.
Koordenadór ba Intelijénsia Artifisiál no Dezenvolvimentu Sistema Teknolojia no Inovasaun, Norberto Soares Cristóvão, hato’o katak papél prinsipál ne’ebé IX Governu Konstitusionál atribui ba Ministériu Transporte no Komunikasaun (MTK), liuhusi Ajénsia TIC TIMOR, mak atu implementa no promove governu eletróniku (e-Government) iha entidade Estadu sira.
“Bazeia ba pedidu ne’e, Ministériu Justisa husu apoiu tékniku atu dezenvolve Sistema Jestaun Rekursu Umanu. Tanba ne’e, TIC TIMOR ho vontade no koordenasaun di’ak ho Ministériu Justisa atu implementa sistema refere, hodi promove servisu dijitál ho efetividade. Maibé, iha kestaun balu ne’ebé seidauk refleta tuir nesesidade Ministériu Justisa nian, nune’e sei halo ajustamentu tan atu sistema ne’e bele fó apoiu di’ak liután ba servisu MJ,” dehan Norberto Soares Cristóvão iha komunikadu ne’ebé Média Democracia asesu iha Kuarta-feira (16/09).
Iha parte seluk, Diretór Nasionál Rekursu Umanu Ministériu Justisa (DNHR), João Mau Pelo da Costa, informa katak, durante ne’e, prosesu rejistu no jestaun dadus funsionáriu sira sei uza meius manuál. Tanba ne’e, digitalizasaun sistema rekursu umanu sai hanesan prioridade ida ba Ministériu Justisa.
“Ami hakarak hato’o gratidaun ba TIC TIMOR ne’ebé iha vontade atu fó asisténsia téknika hodi kria Sistema HRMS. Sistema ne’e sei permite ami jere no rejista dadus funsionáriu sira, husi nível nasionál to’o munisípiu. Durante ne’e, ami uza meius manuál, tanba ne’e ami hakarak asegura katak dadus sira bele protejidu no moderniza liuhusi digitalizasaun, nune’e fasilita asesu ba informasaun ho lalais no efisiénsia,” dehan João Mau Pelo da Costa.
Alende ne’e, aprezentasaun Sistema HRMS mós fó oportunidade ba Diretór/a sira, kargu xefia no funsionáriu Ministériu Justisa atu komprende oinsá atu utiliza sistema refere no oinsá sistema ne’e bele apoia prosesu jestaun rekursu umanu iha Ministériu Justisa.
Reportajem: Octaviana da Costa
Foto: TIC TIMOR