Díli, 22 Outubru 2026 (Média Democracia) – Governu Timor-Leste prevee orsamentu US$ 40.000 ba Institutu Nasionál Kombate HIV-SIDA (INCSIDA.IP) hodi suporta realiza selebrasaun Loron Mundial HIV-SIDA, ne’ebé sei hala’o iha loron 1 Dezembru 2026, iha área Mota-Ain, Munisípiu Bobonaru, besik fronteira Maliana.
Prezidente INCSIDA.IP, Daniel Marçal, hato’o informasaun ne’e ba jornalista Média Democracia iha Batugade, kinta-feira (22/10), no esplika orsamentu ne’e sei uza ba atividade sira ne’ebé planeia atu hala’o durante selebrasaun, inklui transporte, alimentasaun ba partisipante sira, konvite banda muzika no artista sira, konsultasaun saúde, teste HIV no atividade seluk.
Daniel Marçal esplika, maske orsamentu ne’e limitadu, INCSIDA.IP sei prepara atividade oioin hamutuk ho komunidade atu komemora Loron Mundial HIV-SIDA no hasa’e konsiénsia públika kona-ba prevensaun no tratamentu HIV.
“INCSIDA prepara orsamentu uitoan atu hamutuk ho komunidade sira selebra Loron Mundial HIV-SIDA iha Mota-Ain. Atividade balun ne’ebé sei hala’o mak kompetisaun sa’e bua, dada tali, konsultasaun saúde, teste HIV no doasaun ran,” nia dehan.
Nia haktuir suku ualu (8) husi Munisípiu Bobonaru sei partisipa iha selebrasaun ne’e. Tuir nia informasaun, suku ida-idak sei reprezenta hosi ema na’in 100, nune’e total partisipante ne’ebé planeia atu partisipa hamutuk ema na’in 800.
Atu fasilita partisipasaun komunidade nian, INCSIDA.IP sei prepara hahán no apoiu transporte ba partisipante sira, liuliu ba suku sira ne’ebé distánsia dook husi fatin atividade. Maibé, komunidade sira ne’ebé hela besik fatin selebrasaun bele lao ain.
Daniel Marçal afirma preparasaun sira ne’e importante atu garante komunidade sira bele partisipa ativu iha komemorasaun Loron Mundial HIV-SIDA, ne’ebé nia objetivu mak hasa’e koñesimentu kona-ba HIV, promove prevensaun, no enkoraja ema atu asesu ba teste no tratamentu.
Reportajen: Pedrito Dos Santos
Foto: Pedrito Dos Santos