AJTL Hamutuk ho Oxfam Fasilita Treinamentu Ba Jornalista Hamutuk 27
Díli 18 Maiu 2026 ( Media Democracia) – Asosiasaun Jornalista Timor-Leste (AJTL) hamutuk ho Oxfam fasisilta treinamentu ida ba jornalista sira hodi hasa’e kapasidade no haburas koñesimentu kona-ba direitu feto nian ba rai no propriedade iha Timor-Leste.
Tuir formadór Tito Maia dos Reis esplika katak seguransa direitu feto nian ba rai no propriedade importante tebes ba dezenvolvimentu sosial, ekonomia no justisa iha rai-laran.
“Tanba rai la’ós de’it fatin atu hela ka halo to’os, maibé mos sai fonte moris, identidade kulturál no eransa família nian. Maske iha Konstituisaun RDTL garante igualdade entre feto no mane iha lei nia oin, iha realidade loron-loron sei iha barak feto ne’ebé hasoru difikuldade atu asegura sira nia direitu ba rai. Situasaun ida ne’e akontese tanba influénsia tradisaun, falta dokumentu legál no menus informasaun kona-ba lei sira ne’ebé protege sira nia direitu”. Dehan formadór Tito Maia dos Reis iha Oxfam, Hudi-laran
Nia afirma tan treinamentu ne’e partisipa husi jornalista hamutuk ema 27 ne’ebé mai husi media oioin, hanesan Media Demokracia, TVE, Independente, SAP News TL, Media One Timor, Media Mudansa no media Inklui NGO Balun No Radio.
Iha sorin seluk, Francisca Ximenes, jornalista husi Media One Timor, hatete treinamentu ida ne’e ajuda tebes atu aumenta nia koñesimentu no hasa’e nia kapasidade iha área jornalizmu, liuliu kona-ba asuntu direitu feto nian.
“Materia sira ne’ebé ami aprende iha treinamentu ida ne’e importante atu ajuda Jornalista sira bele fó informasaun ne’ebé loos no edukativu ba komunidade,” dehan Francisca.
Entertantu husi Treinamentu ne’e espera bele kontribui ba jornalista sira, Nune bele kapasitas Sira halo kobertura ne’ebé kle’an no sensível liu kona-ba asuntu igualdade direitu no asesu feto ba rai no propriedade iha Timor-Leste.
Reportajen : Nelson Ferreira
Foto : Nelson Ferreira