DILI, 8 Setembru 2026 (Media Democracia) – Akademia Militar Konjunta (AMC) kontinua haforsa kualidade ensinu no aprendizajen ba kadetes liuhusi programa edukasaun sistemátiku no integradu, liuliu iha matéria Matemátika no Língua Portuguesa, nu’udar parte husi esforsu atu dezenvolve koñesimentu, disiplina, responsabilidade no kompeténsia profisionál kadetes ba sira-nia futuru iha servisu militar.
Komunikado ne’ebé Média Demokrasia asesu liu hosi pajinal ofisial IDN katak, Iha Tinan Eskolar 2026, Kadetes AMC hahú atividade aula ba matéria akademika sira ne’ebé konsidera importante ba dezenvolvimentu kapasidade intelektual no profisionál, ho matéria Matemátika no Língua Portuguesa.
Matéria Matemátika hanorin husi Dosente Abrão Marques, enkuantu Língua Portuguesa hanorin husi Dosente Abrão Neto Freitas.
Liuhusi prosesu ensinu ne’ebé planeadu, Kadetes hetan oportunidade atu aumenta koñesimentu, dezenvolve abilidade no forma atitude ne’ebé relevante ba sira-nia vida akademika no futuru profisionál.
Aula Matemátika iha papel importante atu dezenvolve kapasidade Kadetes iha hanoin lójiku, kalkulasaun, análize no rezolusaun problema.
Liuhusi matéria ida-ne’e, Kadetes la’ós de’it aprende kona-ba konseitu no fórmula Matemátika, maibé mós aprende atu analiza problema ho métodu ne’ebé sistemátiku, halo komparasaun, buka solusaun no foti konkluzaun bazeia ba razaun no evidénsia.
Kompeténsia sira-ne’e importante la’ós de’it iha ambiente akademiku, maibé mós iha servisu militar.
Iha situasaun profisionál, membru militar presiza iha kapasidade atu analiza situasaun, foti desizaun ho lójika no responde ba dezafiu ho maneira responsavel no efisiente.
Enkuantu, aula Língua Portuguesa fó oportunidade ba Kadetes atu dezenvolve kapasidade lee, hakerek, ko’alia no komunika ho lian ne’ebé klaru no apropriadu.
Aprendizajen ida-ne’e mós ajuda Kadetes atu kompriende estrutura linguístika, aumenta vokabuláriu no dezenvolve kapasidade atu organiza no aprezenta ideia ho maneira sistemátika.
Kompeténsia iha Língua Portuguesa konsidera importante tebes ba formasaun Kadetes, tanba iha ambiente akademiku no profisionál, sira sei hasoru dokumentu ofisiál, relatóriu, regulamentu, instrusaun, literatura no materiál akademiku sira ne’ebé uza lian Portuguesa.
Ho kapasidade komunikasaun ne’ebé di’ak, Kadetes bele hala’o komunikasaun ho efetivu, hakerek dokumentu ho estrutura di’ak no halo apresentasaun ho konfiansa. Ida-ne’e mós bele suporta sira iha dezenvolvimentu lideransa no interasaun profisionál iha futuru.
Aula Matemátika no Língua Portuguesa la limita de’it ba transmisssaun koñesimentu téoriku, maibé mós orienta Kadetes atu aplika koñesimentu ne’ebé sira aprende iha situasaun prátika.
Abordajen ida-ne’e importante atu liga aprendizajen iha sala aula ho nesesidade real iha ambiente akademiku no profisionál.
Liuhusi atividade ensinu no aprendizajen, Kadetes aprende atu iha disiplin, responsabilidade, pontualidade no interese ba prosesu aprendizajen. Sira mós hetan oportunidade atu dezenvolve pensamento kritiku, kapasidade rezolusaun problema, abilidade komunikasaun no atitude servisu hamutuk.
Kompeténsia sira-ne’e sai parte importante husi formasaun Kadetes tanba objetivu edukasaun militar la’ós de’it atu fó koñesimentu tékniku, maibé mós atu forma individu ne’ebé iha integridade, lideransa, responsabilidade no prontidaun atu hala’o knaar ho profissionalizmu.
Atividade akademia aula Matemátika no Língua Portuguesa durante Tinan Eskolar 2026 sai parte husi esforsu Akademia Militar Konjunta atu kontinua hasa’e kualidade edukasaun no dezenvolve kapasidade Kadetes ho abordagem ne’ebé ekilibradu entre koñesimentu akademiku, abilidade no formasaun karakter.
Ho orientasaun husi Dosente Abrão Marques iha matéria Matemátika no Dosente Abrão Neto Freitas iha matéria Língua Portuguesa, Kadetes hetan oportunidade atu aprofunda sira-nia koñesimentu no dezenvolve kompeténsia ne’ebé presiza ba vida akademika no profisionál.
Liuhusi programa edukasaun hanesan ne’e, AMC espera katak, Kadetes sei kontinua dezenvolve-an sai profisionál militar ne’ebé disiplinadu, responsavel, iha pensamento kritiku, kapasidade lideransa no abilidade komunikasaun, hodi iha futuru bele kontribui ho di’ak ba instituisaun, nasaun no povu Timor-Leste.
Aula sira-ne’e hala’o iha Eskola Akademia Militar Konjunta, Hundolte, Aileu, durante semana ida, ho orientasaun husi dosente sira ne’ebé responsavel ba kada matéria.
Reportajen: Octaviana da Costa
Foto: Hosi Média IDN