Dili, 8 Setembru 2026, (Média Democracia)- Asosiasaun Akadémika Estudántil Fakuldade Edukasaun Arte Umanidade (FEAH), Eziji suspende profosóra na‘in-rua ne’ebé komete aktu abuzu poder no kobransa ilegál tanba ne’e asosiasaun Akademika amaeasa sei halo asaun pasifiku hasoru reitór ho nia estrutura
Tuir Prezidente Asosiasaun Estudantil Fakuldade Edukasaun, Benjamin Gusmão Matos hateten, kazu kobransa ilegal no abuzu poder ne’ebé estudante sira denunsia ona iha fulan tolu ba kotuk.
“Kazu dahuluk akontese iha departemenu tetun, dosente ida alegamente halo kobransa ilegál ba estudante sira. iha 2017 profesóra ne’e kobra $17.50, ba estudante hamutuk na’in-62, iha tinan 2022 kada estudante kontribui $4 dollar ba estudante na’in-179 no iha 2023 halo tan kobra $10 dollar ba estudante na’in-5. Kazu daruak akontese iha departemenu fizika, tuir Benjamin diretóra departemenu rasik komete abuzu poder liuhusi falsifikasaun notas estudante, maske nia laos dosente ba material”.dehan Prezidente Asosiasaun Estudantil Fakuldade Edukasaun, Benjamin Gusmão Matos, iha Kampuz Liceu (08/09/2026)
Nia relata tan katak, Despaixu reitór budu fulan rua iha gabeta konsellu disiplinar. Ba problema rua ne’e, FEAH submete ona karta ba reitór iha fulan hirak ba kotuk, hafoin ne’e reitór hatun despaixu ho númeru 93/UNTL/R/VI/2026, ba konsellu disiplinar hodi loke prosesu investigasaun.
“Maibé konsellu disiplinar ne’ebé lidera husi ita Prezidente konsellu Alexandre Gentil Corte Real, ho nia estrutura budu fali despaixu ne’e iha sira nia gabate okos hodi ignora estudante sira nia problema,” nia afirma
Nia dehan, FEAH halo komfirmasaun dalabarak ona ho konsellu disiplinar, maibé fulan rua ne’e despaixu ne’e seidauk tun atu suspende profesóra na’in-2 ne’e.
“Sira dehan desizaun hotu-hotu ami foti ona no ami diside ona. Maibé ami hein despaixu ne’e fulan rua ona, enkuantu despaixu nunka mosu no profesóra na’in-2 nafatin halo sira nia servisu,” nia esplika.
Benjamin mós hato’o preokupasaun, tanba profesóra na’in-2 alegamente halo vingansa hasoru estudante iha prosesu orientasaun proposal no monografia.
“Nia dehan, ha’u koñese imi sira ne’ebé halo komferénsia imprensa ne’e muito bem, ba oin ita boot sira tenke kuidadu, ida ne’e ami lamentavel tebes tanba sei impede estudante sira nia prosesu orientasaun proposaun no monografia,” nia dehan.
Tanba ne’e, estudante sira konsidera reitór inkapsidade atu lidera universidade, tanba sakrifa estudante sira iha prosesu aprendizajen no prosesu orientasaun proposal no monografia.
Nia esplika FEAH fo Ultimatu loron tolu ba reitór UNTL ho Estrutura. Iha okaziaun ne’e, estudante sira fo Ultimatu loron tolu ba reitór ho nia estrutura atu solusiona problema refere.
“Ami reafirma dala ida tan, karik kazu ne’e la konsege rezolve, mak asosiasaun FEAH, sei organiza asaun pasifiku,” Benjamin deklara.
Hafoin komferénsia imprensa, FEAH sei submete hikas karta rekoñese ida ba reitór katak, iha loron tolu tuir mai asaun pasifiku sei akontese.
“Ami atu hato’o ba reitór katak, loron tolu tuir mai ami sei halo asaun pasifiku hasoru ita-boot ho estrutura, tanba ignora pedidu asosiasaun estudante Akademika nian,” Nia hakotu.
Reportajen: Octaviana da Costa
Foto: Octaviana da Costa