Dili, 5 Setembru 2026 (Media Democracia)– Autoridade Protesaun Sivil (APC), aviza ba komunidade atu la labele paniku kona-ba informasaun relasiona ho risku rai-nakdoko ne’ebé sirkula iha media no redes sosiál, no husu públiku atu fiar de’it informasaun husi fonte ofisiál no kredível, tanba oras no data kona-ba akontesimentu rai-nakdoko seidauk bele prediz.
Tuir Prezidente Autoridade Protesaun Sivil (APC), Jesuino dos Reis Matos Carvalho hateten, responsavel ba monitorizasaun no prevensaun dezastre hato’o agradese ba media sira ne’ebé kontinua fahe informasaun ba públiku, inklui informasaun kona-ba situasaun rai-nakdoko ne’ebé publika ona husi fonte monitorizasaun meteorolojia no sismolojia.
Prezidente subliña katak, iha asuntu relasiona ho dezastre naturál, fontes kredível no ofisiál mak importante tebes atu fo informasaun ba komunidade, atu nune’e públiku bele simu informasaun ne’ebé loos no evita propagasaun informasaun ne’ebé bele hamosu paniku.
“Risku sempre iha ba ita hotu. Programa monitorizasaun no prevensaun sei kontinua lao, no ami sei kontinua fó avizu ba komunidade sira atu kuidadu an no hases an husi fatin ne’ebé konsidera iha risku,”dehan Prezidente Autoridade Protesaun Sivil (APC), Jesuino dos Reis (04/09/2026)
Nia informa tan tuir informasaun sira ne’ebé disponivel, Timor-Leste lokaliza iha zona tektonika ne’ebé iha atividade sismika, tanba besik ho plaka tektonika iha rejiaun Indonézia. Situasaun ida-ne’e bele halo Timor-Leste sente tremor bainhira akontese movimentu sismiku iha rejiaun besik, maibé la signifika katak rai-nakdoko sei akontese iha oras ka loron espesífiku.
Nia relta liu tan katak, maski iha dadus sientífiku no dezenhu kona-ba zona ne’ebé iha risku, teknolojia atual seidauk permite deteta ho presiza katak rai-nakdoko sei akontese iha oras, loron ka data espesífiku.
“Tanba ne’e, komunidade sira husu atu lalika paniku bainhira rona informasaun ne’ebé la klaru ka la iha fonte, maibé tenke verifika uluk ba instituisaun kompetente antes fahe ba ema seluk”. Nia informa
Nia mos esplika Media mos iha papel importante atu apoia esforsu prevensaun liu husi fahe informasaun ne’ebé loos, klaru no bazeia ba fonte kredível, atu komunidade bele kompriende situasaun no prepara an ho di’ak.
Autoridade sira enfatiza fali katak informasaun kona-ba posibilidade rai-nakdoko la bele interpreta hanesan prediksaun katak rai-nakdoko sei akontese agora ka iha loron espesífiku.
Nune’e, komunidade tomak husu atu nafatin kalma, la halo paniku no acompanha informasaun husi fonte ofisiál, enkuantu autoridade no parseiru sira kontinua monitoriza situasaun no fó avizu bainhira iha informasaun importante kona-ba risku dezastre.
Reportajen : Tomás dos Santos
Foto : Tomás dos Santos