Díli, 16 Setembru 2026 (Média Democracia) – Komisaun Anti-Korrupsaun (CAC), liuhusi Diresaun Prevensaun no Sensibilizasaun (DPS), hamutuk ho ekipa Unidade Promosaun Valór no Integridade (UPVI), hala’o atividade sensibilizasaun anti-korrupsaun iha Ilha Atauro, durante loron 14 to’o 17 Setembru 2026.
Atividade ne’e fó atensaun ba estudante no profesór sira iha eskola, no mós hala’o diskusaun direta ho komunidade kona-ba importánsia prevensaun korrupsaun, hametin valór integridade no hasa’e partisipasaun sidadaun sira nian atu tau matan ba implementasaun no jestaun rekursu públiku iha sira-nia área.
Sensibilizasaun ba estudante no profesór sira hala’o iha EBC Biqueli, EBF Macadade, ESTV Atauro, ESGP-99 no ESGP Parelo.
Atividade hirak ne’e parte husi esforsu kontínuu CAC nian atu hasa’e komprensaun no konsiénsia estudante no profesór sira kona-ba importánsia prevensaun korrupsaun no promosaun valór integridade, hahú husi ambiente eskola.
Diretór Jerál Prevensaun no Sensibilizasaun, Antonino Alves, haktuir katak, objetivu husi atividade ne’e mak atu fahe koñesimentu kona-ba papel no mandatu CAC, responsabilidade komunidade iha prevensaun korrupsaun, no aspetu importante sira iha Lei Nú. 7/2020 kona-ba Medida Prevensaun no Kombate Korrupsaun (MPCC).
“Atividade ne’e halo parte husi esforsu rútina CAC nian atu hasa’e koñesimentu estudante no komunidade sira, atu sira komprende di’ak katak prevensaun korrupsaun la’ós responsabilidade instituisaun anti-korrupsaun de’it. Esforsu ida-ne’e presiza partisipasaun husi sidadaun hotu, liuliu estudante sira ne’ebé sei sai vanguarda ba dezenvolvimentu nasaun nian iha futuru,” dehan Antonino Alves, tuir komunikadu CAC ne’ebé Média Democracia asesu iha Kuarta-feira (16/09).
Iha prosesu sensibilizasaun, ekipa CAC uza métodu aprezentasaun no diskusaun interativa hodi fasilita partisipante sira komprende di’ak konseitu no pratika integridade iha moris loroloron.
Estudante no profesór sira mós hetan oportunidade atu hato’o pergunta, fahe sira-nia hanoin no diskute situasaun sira ne’ebé relasiona ho integridade, responsabilidade no prevensaun korrupsaun iha ambiente eskola no komunidade.
Aleinde aprezentasaun no diskusaun, CAC mós fahe materiál promosaun valór anti-korrupsaun, inklui Buletin Integridade, kaos, brosura, Lei MPCC no sticker ba estudante no profesór sira.
Materiál promosaun hirak ne’e sai nu’udar instrumentu komunikasaun CAC nian atu kontinua hasa’e konsiénsia no hametin mensajen kona-ba valór integridade, transparénsia, responsabilidade no prevensaun korrupsaun.
Aleinde atividade iha eskola, durante prezensa CAC iha Atauro, ekipa mós hala’o diskusaun direta ho komunidade kona-ba papel no responsabilidade komunidade iha prevensaun korrupsaun, liuliu iha kontestu implementasaun projetu Estadu nian iha terenu.
Diskusaun ne’e sai nu’udar espasu ba ekipa CAC no komunidade atu ko’alia diretamente kona-ba importánsia partisipasaun sidadaun sira nian iha prosesu monitorizasaun implementasaun projetu sira ne’ebé uza rekursu públiku.
Iha oportunidade ne’e, CAC enkoraja komunidade atu tau matan ba implementasaun projetu sira tuir planu, no asegura rekursu Estadu uza ho responsabilidade no transparénsia.
“Involvimentu komunidade importante atu ajuda ita-nia Estadu garante projetu sira ezekuta tuir planu, uza rekursu Estadu nian ho responsabilidade no nakloke ba ema hotu atu hatene. Komunidade tenke iha papel ativa atu tau matan ba projetu sira ne’ebé implementa iha sira-nia área, tanba osan ne’ebé uza ba projetu hirak ne’e osan povu nian, no komunidade iha direitu atu hatene kona-ba oinsá rekursu hirak ne’e jere,” dehan Antonino Alves.
Reportajem: Octaviana da Costa
Foto: CAC