DILI, 10 Juñu 2026 (Media Democracia)- Centro Nacional Chega I.P (CNC) ofisialmente inaugurasaun ba Edifísiu Sentru Arkivu Chega Foun iha Antigu Komarka Balide Dili, Konstrusaun ne’ebé hahú konstrui kuaze tinan rua liu ba, dadaun ne’e finaliza ona, konstrusaun refere investimentu ho orsamentu total $1.1 miliaun husi Orsamentu Jerál Estadu 2024-2025.
Tuir Diretor ezekutivu CNC Hugo Maria Fernandes hateten Objetivu prinsipál husi inaugurasaun Sentro Arkivu foun ne’e atu sai sentru ba prezervasaun arkivu no dezenvolvimentu sistema dokumentasaun modernu iha Timor-Leste
“Ohin loron 9 fulan Juñu ami foti loron ida ne’e atu inagura sentru Chega nian, ne’ebé hahú projetu iha tinan rua liubá no tuir planu loloos remata iha fulan Marsu tinan 2026, maibé tanba presiza halo instalasaun ba ekipamentus iha laran entaun tarde oituan, prosesu ne’e kontinua to’o fim de Maiu mak foin hotu. Konstrusaun ne’e mai husi orsamentu jeral estadu 2024 to’o 25 hamutuk 1.1 Milhoens, konstrusaun ne’e ka’er husi kompaña kontrator lokál Nazare, hamutuk ho kolega mna’in haat (4), dezenu ba edifísiu foun ne’e mai husi kompaña Miceles, entretantu, supervizaun ba projetu tomak halo diretamente husi Ministériu Obras Públika no ADN, hamutuk ho ekipa tékniku husi Centro Chega rasik,” Dehan Diretor Ezekutivu CNC, Hugo Fernandes iha antigo Comarca Muzeu 09/06/2026.
Nia hatutan liu tan Orsamentu refere kobre konstrusaun tomak ho fasilidade sira hanesan salaun, armazén, sala arkivu modernu sira ne’ebé dezena tuir padraun internasionál ba prezervasaun dokumentu.
“Selebrasaun inaugurasaun ne’e Centro Nacional Chega (CNC) mós hala’o atividade tolu ne’ebé importante tebes, hanesan dahuluk Inaugurasaun Edifísiu Sentru Arkivu Chega Foun nu’udar sentru ba prezervasaun arkivu no dokumentasaun modernu iha Timor-Leste, parte da-rua mak Lansamentu Espozisaun Arkivístika, ne’ebé hatudu kolesaun istóriku selesionadu sira husi períodu konflitu no rekonsiliasaun, inklui fotografia, karta, relatóriu, no arkivu dijitálizadu, Semináriu Nasionál, diskute kona-ba Polítika no Enkuadramentu Jurídiku Arkivu no Esbosu Lei Sibermétika” Nia esplika
Nia afirma Sentru Arkivu foun ne’e la’ós de’it fatin ba rai dokumentu administrativu, maibé sai mós memória viva nasaun nian, nia prezerva istória, esperiénsia no evidénsia ne’ebé forma identidade koletiva povu Timor-Leste nian, nune’e mós suporta peskiza istóriku, promove transparénsia no akuntabilidade
Centro Nacional Chega estabelese hodi Dekretu Lei n. 48/2016 ho misaun atu prezerva memória istóriku, promove edukasaun direitu umanu, no suporta inisiativa memorializasaun, rezisténsia, rekonsiliasaun no harii dame
Iha seremonia inagurasaun ne’e hetan Partisipa husi sira instituisaun arkivístiku, akademiku, governu, membru parlamentu, sosiedade sivíl, no parseiru internasionál
Reportajen : Juliana
Foto : Leozalia