Dili, 28 Maiu 2026 (Media Democracia)- Polísia Nasionál Timor-Leste (PNTL), liuhusi Diresaun Servisu Investigasaun Kriminál (DSIK), entrega ona suspeitu na’in tolu (3), ho sasan kontra bandu ba komandu Munisípiu Bobonaro hodi aprezenta ba Ministériu Públiku hodi lao tuir nia prosesu.
Iha kuarta ne’e (27/05), PNTL detein suspeitu na’in-tolu (3) ho naran inisiál AA, RD, no DA ne’ebé importa no transporta sasán kontra bandu, hanesan bebidas Coca-cola, Sprite, Red Bull, Larutan Cap Kaki tiga, Milko, Pocari Sweat no seluk tan.
Bazeia ba informaaaun ne’ebé Media Democracia hetan katak ekipa konjunta kompostu husi Unidade Polísia Maritima (UPM), N2 Komponente Naval FALINTIL-Forsa Defeza Timor-Leste (F-FDTL) kaptura suspeitu na’in-tolu hamutuk ho evidénsia ba krime sasán kontra-bandu iha área Tibar, Munisípiu Liquiça iha oras tuku 14:00 otl.
Bainhira ekipa konjunta hapara tiha transporte iha Tibar ekipa transporta kedas evidénsia sira ba Kuartel Jerál PNTL iha edifisiu Diresaun Servisu Investigasaun Kriminál (DSIK) hodi submete prosesu enkéritu no identifikasaun.
Hafoin ekipa entrega ba Diresaun Servisu Investigasaun Kriminal kontinua kedas submete ba prosesu flagrante-delitu, ne’ebé kazu refere prosesu ho NUK: 0199/26.PNSIC.
Reportajen: Estefánia Cardoso
Foto: Estefánia Cardoso