Dili, 22 Jullu 2026 (Media Democracia)– Feto foin-sa’e ida naran Lurdes Tavares Soares, tinan 22, husi Munisípiu Ermera, Postu Administrativu Atsabe, Suku Liamialeten, Aldeia Orbete, agora dadaun hela iha Suku Bairro Pite, Aldeia Baileste, hala’o negósiu ki’ik nu’udar fonte importante ba rendimentu família. Nia esforsu ne’e ajuda sustenta nesesidade uma-laran no kontinua apoiu nia estudu. Lurdes mak oan ba Rosita Soares, dona de casa, no Egedio Tavares, nu’udar agrikultór.
Tuir negosiante Lurdes Tavares Soares, hateten oinsa zere tempu ba eskola, hala’o negósiu ki’ik fa’an tahu, tempe, tomate no ai-han seluk iha Merkadu Manleuana hodi sustenta nesesidade loron-loron, apoiu família no selu nia estudu.
“Ha’u estuda iha Instituto Ciências de Saúde (ISC), Faculdade Saúde, Departamentu Parteira, Semester VI, kada loron, depois de ha’u tuir aula hotu, ha’u fila uma, kontinua kedan fa’an tempe, tahu, tomate no sasan seluk. Oras ne’ebé ha’u fa’an ne’e hahu sasan husi tuku 08:00 dadeer to’o tuku 09:00 kalan, maibé iha oras eskola nian ha’u tuir aula. Husi negósiu ki’ik ida-ne’e, dala barak ha’u bele hetan to’o US$200 iha loron ida, no menus liu US$50. Kada fulan, rendimentu kuaze to’o US$700. Osan ne’e balun ha’u uza atu sosa fila-fali sasan atu fa’an no balun ha’u rai iha depositu iha uma,” dehan Lurdes iha Merkadu Manleuana (21/07/2026).
Nia afirma tan rendimentu husi negósiu ne’e ajuda tebes ekonomia, oinsa atu sustenta família no kontinua hala’o estudu.
“Osan ne’ebé hau hetan loron-loron husi fa’an tempe no tahu mak ha’u uza hodi selu eskola, transporte nian, fotokópia no materiál estudu. Hau kontente tebes tanba negósiu ki’ik ida-ne’e salva ona hau nia estudu,” hateten nia
Maski nune’e, Lurdes mos relata katak durante hala’o nia negósiu maske hasoru dezafiu balun, liuliu ameasa no impedimentu husi membru balun husi ekipa Secretária de Estado Assuntos Toponímia no Organização Urbana (SEATOU).
“Durante ha’u halo negósiu iha fatin ida-ne’e, dala barak ha’u hetan ameasa husi ekipa SEATOU sira. Dala ruma sira mai baku-rahun ami nia sasan negósiu nian,” dehan Lurdes.»
Iha remata entrevista, Lurdes hato’o mensajen ba feto no mane foin-sa’e sira atu aproveita tempu ho di’ak no buka atividade produtiva ne’ebé bele fó benefísiu ba moris iha futuru.
Reportajen: Delfiano Leão Pereira estajiariu
Foto: Joaninho