Dili 22 Julli (Media Democracia)- Organizasaun Revolta Boxing Club realiza konferénsia imprensa hodi anunsia partisipasaun atleta boxing Timor-Leste na’in neen ne’ebé sei reprezenta nasaun iha kompetisaun Holywings Sport Show (HSS), ne’ebé sei realiza iha Bali, Indonézia, iha loron 26 Jullu 2026. Konferénsia ne’e mos atu hatudu preparasaun atleta sira no husu apoiu husi povu Timor-Leste atu fó motivasaun ba reprezentante sira iha arena internasionál.
Tuir Ministru Joventude Desportu Arte e Kultura (MJDAK) Nélyo Isaac Saramento partisipa mos iha komferésia imprensa ida ne’e hateten eventu ida ne’e la’os akontese iha Timor maibé iha HSS Holywings sport show iha Bali Indonesia.
“Iha eventu Boxing mais la’os akontese iha Timor maibé ita sei reprezentasaun joven boxing lubuk ida Timor-oan nian, komesa atu ba partisipa iha jogu profesional boxing nian iha Bali, Indonésia eventu ida ne’e ita bolu Holywings Sport Show, (HSS) ne’ebé Indonesia mak promove hanesan uma na’in ba kompetisaun entre Boxista profissional Indonésia ho Boxistas Timor-Leste nian. Ita lori boxsista lubuk ida, sira hamutuk iha na’in neen (6) iha klase diferente, atu ba kompete ho boxsista Indonésia nian iha Bali, iha dia 26 Juliu fulan ida ne’e. Saída mak ita hakarak espresa husi partsipasaun fó oportunidade ba boxsista hotu iha Timor ne’ebé atu tama ba profissional hanesan espasu ida atu hatudu sira nia prestasaun iha área boxing ne’e rasik.” Dehan Ministru MJDAK Nélyo Isaac (21/07/2026).
Nia afirma liutan katak, espera katak ho delegasaun Timor-Leste sei aproveita oportunidade ne’e atu aprende kona-ba organizasaun eventu boxing profesional husi promotor sira iha Indonézia. Nia espera katak esperiénsia ne’e bele loke dalan ba atleta Timoroan sira atu asesu ba kompetisaun internasionál seluk no, iha futuru, Timor-Leste bele organiza eventu boxing profesional rasik ho konvite ba atleta internasionál sira.
Iha oportunidade hanesan, CEO no Promotór Revolta Boxing Club, Sander Sereano, akresenta tan partisipasaun iha HSS resulta husi kooperasaun entre promotor boxing Timor-Leste no Indonézia. Nia mos agradese ba atleta Timoroan sira ne’ebé uluk konsege halo prestasaun iha rai liur, tanba sira mak loke oportunidade ba atleta foun sira atu hetan konvite ba eventu internasionál.
“Hau senti oinsa buka ligasaun ho atleta sira ba maibé ami mós lá haluha hato ona Timoroan sira ne’ebé antes kompete iha eventu sira, iha internasional iha Bali no mós iha rai liur, hanesan mós Delio, Daniel no mós atleta sira seluk”. Dehan CEO no Promotór Revolta Boxing Club, Sander Sereano.
Nia afirma tan Timoroan mós iha poténsia ne’ebe halo mós promotor sira husi rai liur iha interese atu bolu atleta sira. Agradese atleta sira ne’ebé mak primeiru ba kompete iha internasional, tanba sira mak hatudu no loke promotor sira husi rai liur nia matan, iha interese atu bolu tan Timoroan barak.
Enkuantu ne’e, atleta Delio Anzaqeci Mauzinho afirma katak nia no kolega sira prepara-an ho di’ak atu kompete iha HSS Bali. Objetivu boot mak atu hatudu desempenhu di’ak no lori naran di’ak ba Timor-Leste.
“Hau prepara ona ho di’ak ba kompetisaun ida ne’e. Ami hotu hakarak manán no fó orgulho ba povu Timor-Leste. Ho disiplina, servisu maka’as no preparasaun di’ak, ami fiar bele hetan rezultadu ne’ebé di’ak,” dehan Delio.
Atleta boxing Timor-Leste na’in neen ne’e sei tama iha kompetisaun Holywings Sport Show (HSS) iha Bali, Indonézia, iha loron 26 Jullu 2026, ho esperansa atu hatudu kapasidade atleta Timoroan sira no hasa’e naran Timor-Leste iha mundu boxing profesional.
Reportajen : Joanihno Martins / Defiano Leão Pereira / Estajiariu
Foto : Defiano Leão