Dili, 28 Outubru 2026 (Média Democracia) – Prezidente Autoridade Munisipál Dili (PAM), Francisco dos Santos, informa kapasidade espasu ba hakoi isin mate iha Semitériu Bekusi besik to’o limite ona, no prevé katak kapasidade máximu sei atinje iha fulan Novembru 2026. Atu responde ba situasaun ne’e, PAM kontinua aselera preparasaun administrativa, téknika no operasionál hodi hahú funsionamentu Semitériu Metinaro, atu garante disponibilidade espasu ba hakoi isin mate iha futuru.
Tuir esplikasaun Fransisco dos Santos, kondisaun Semitériu Bekusi ne’ebé tama ona iha faze krítika bele afeta disponibilidade fatin ba hakoi isin mate foun iha Munisípiu Dili.
“Semitériu Bekusi agora daudaun tama ona ba faze krítika, tanba kapasidade espasu disponivel ba hakoi isin mate besik to’o limite ona. Prevê katak kapasidade máximu semitériu ne’e sei atinje iha fulan Novembru 2026. Kondisaun ida-ne’e preokupa tebes, tanba bele difikulta disponibilidade fatin ba hakoi isin mate foun sira iha Munisípiu Dili,” dehan Fransisco dos Santos, iha konferénsia imprensa ne’ebé hala’o iha salaun PAM, kuarta-feira (28/10).
Nia hatutan, atu responde ba situasaun ne’e, PAM kontinua servisu hamutuk ho entidade relevante sira hodi aselera preparasaun ba funsionamentu Semitériu Metinaro, atu responde ba nesesidade komunidade nian iha tempu agora no iha futuru.
“PAM kontinua servisu hamutuk ho entidade relevante sira atu aselera preparasaun administrativa, téknika no operasionál ba hahú funsionamentu Semitériu Metinaro, atu responde ba nesesidade atual no futuru komunidade nian. Ida-ne’e atu aumenta kapasidade espasu ba hakoi isin mate no evita problema sira ne’ebé bele mosu tanba limitasaun espasu iha semitériu sira,” nia afirma.
Aleinde ne’e, líder munisipál ne’e husu ba komunidade atu konsidera uza fali rate ka kampu família ne’ebé eziste ona, ho kondisaun katak tenke hetan autorizasaun husi PAM no kumpre regra sira ne’ebé vigora.
“PAM bele autoriza, tuir pedidu família no regra ne’ebé vigora, atu uza fali rate ka kampu família ne’ebé eziste ona hodi hakoi membru família ne’ebé foin mate. Medida ida-ne’e aplika ba Semitériu Bekusi, Bidau Santa Ana no Cacaulidun, ho respeitu ba dignidade matebian sira no kumpre norma sanitária no dispozisaun legál sira ne’ebé vigora,” nia esplika.
Iha parte seluk, Fransisco dos Santos husu mós ba família sira ne’ebé hakarak transfere restu mortál membru família nian husi semitériu ida ba semitériu seluk, inklui ba munisípiu seluk, atu husu uluk autorizasaun husi PAM no kumpre prosedimentu legál no sanitáriu sira ne’ebé vigora.
Medida sira-ne’e konsidera importante hodi ajuda jere limitasaun espasu iha semitériu públiku sira no garante katak nesesidade komunidade nian ba hakoi isin mate bele hetan solusaun ne’ebé apropriada.
Reportajen: Octaviana da Costa
Foto: Pedrito dos Santos